चितवन, वैशाख ३ –
भरतपुरको बेलुवाका ५० जना कांग्रेसी नेता कार्यकर्ताले पार्टी परित्याग गरेका छन् । कांग्रेस माओवादीकरण भएको भन्दै उनीहरुले पार्टीको साधारण सदस्य पनि नरहने गरी आज शनिबार सामुहिक राजीनामा दिएका हुन् ।
स्थानीय अगुवा प्रकाश कँडेलको अगुवाईमा उनीहरुले एक औपचारीक कार्यक्रम गरी पार्टीबाट राजीनामा दिएको घोषणा गरेका हुन् । स्वतन्त्र नागरिकको हैसियतमा रहने गरी राजीनामा दिइएको कँडेलले बताए ।
राजीनामा दिनेमा पूर्व वडाध्यक्ष देवनारायण महतो र पूर्वपार्टी वडा सभापति विष्णुप्रसाद सुवेदी समेत छन् ।
पार्टी स्वार्थ केन्द्रित राजनीतिमा लिप्त भएको र राष्ट्रघाती एमसीसी पास गरेको कँडेलको आरोप छ । कांग्रसले सबै सरकारी कलकारखाना निजीकरण गर्दै बेचेको पनि उनले बताए ।
सत्तारूढ गठबन्धनभित्र भरतपुर महानगरको मेयर नेकपा माओवादी केन्द्रलाई दिने तयारी भएपछि चितवनका कांग्रेस कार्यकर्ता बिच्किएका छन् । जिल्ला नेताहरूले शीर्ष नेतालाई भेटेर भरतपुरको मेयर पद नछाड्न दबाब दिँदै आएका छन् । कार्यकर्तापंक्ति देखि जनस्तरमा पनि कांग्रेस शुभेच्छुकहरु असन्तुष्ट रहेका छन् ।
