चितवन, बैशाख ३ –
नेकपा (एमाले)का नेता महेश बस्नेतले राप्रपाका उपाध्यक्ष बिक्रम पाण्डेलाई चितवनमा सूर्य चिन्ह लिएर चुनाव लड्न आग्रह गरेका छन् ।
आज भरतपुर विमानस्थलमा सञ्चारकर्मीहरुसँग कुराकानी गर्दै नेता बस्नतेले पाण्डेलाई यस्तो आग्रह गरेका हुन् ।
‘मैले त अघिल्लो पटक पनि बिक्रम पाण्डे जीलाई नेकपा एमालेमा आएर अथवा सूर्य चिन्ह लिएर लड्ने मानसिकता बनाउनुस्, त्यसो हुँदा रेनु दाहालका बालाई हराउन सकिन्छ भनेको हो’ नेता बस्नेतले भने, ‘अब रेनु दाहालको ‘बा’प्रति सहानुभूति बिक्रम पाण्डेको कति छ ? म जान्दिन अब उहाँको सहानुभूति छैन र यो मुलुकमा निर्वाचित सांसद भएर हेर्ने उहाँको रहर छ भने उहाँले चाहिँ एमालेमा प्रवेश गर्ने अथवा एमालेको सूर्य चिन्ह लिने कुरा चाहिँ उहाँको लागि सबैभन्दा राम्रो आधार हुन्छ भन्ने चाहिँ मलाई लाग्छ ।’
एमालेको चुनाव चिह्न सूर्य लिएर साना दलका उम्मेदवारले पनि चुनाव लड्न पाउने गरी गरेको सहमतिलाई गठबन्धन भन्न नमिल्ने उनले बताए । ‘नेकपा एमालेको आकर्षण र प्रभावबाट विभिन्न दलका नेताहरू नजिक हुनुभनेको एमालेसँग निकट हुनु हो,’ उनले भने ।
यसपालि देशभरी नै निर्वाचनमा एमालेले धावा बोल्ने उद्घोष गरिसकेको उनले बताए । ‘एमालेले गठबन्धन गर्नेभन्दा पनि एमालेप्रति आकर्षण भएका साथीहरूलाई एमालेको चुनाव चिह्न लिएर हामीसँग आउनु खोज्छन् भने हामीले यसलाई फराकिलो ढंगले लिन्छौँ,’ उनले भने ।
यस्तै उनले सत्ता गठबन्धन टुट्ने अवस्थामा रहेको दावी गरेका छन् । ‘सत्ताधारी गठबन्धन टुट्ने अवस्थामा पुगेको र त्यो कारणले निर्वाचनलाई सार्न खोजेको छ,’ उनले भने, ‘एउटा विप्लवलाई चुनावमा ल्याउन सकिन्छ भन्ने बहानाको षड्यन्त्र र अर्को चाही संवैधानिक परिषद्ले नियुक्त गरेका निर्वाचन आयोग लगायतका नियुक्तिलाई अदालतसँग सेटिङ गरेर हटाएर चुनाव सार्न सकिन्छ की भन्नेतर्फ पनि लागेको देखिन्छ ।’
