चितवन, १३ पुस :
इन्डो नेपाल टी–२० च्याम्पियनसिपको उपाधि चितवन क्रिकेट क्लबले जितेको छ । चितवनको गौतमबुद्ध क्रिकेट रंगशालामा आइतबार भएको फाइनल खेलमा शसस्त्र प्रहरी बलको एपीएफ क्बललाई एक विकेटले पराजित गर्दै उपाधि जितेको हो ।
टस जितेर पहिले बलिङ रोजेको चितवनले १ सय ४४ रनको विजयी लक्ष्य पाएको थियो । एपीएफले दिएको विजयी लक्ष्य चितवन क्लबले १९ दशमलव ५ ओभरमा नौ विकेट गुमाएर भेट्टायो । एक बल बाँकी रहँदा चितवनका विपिन खत्रीले छक्का प्रहार गर्दै टिमलाई विजय बनाएका हुन् ।
चितवनलाई विजयी बनाउन शुभ कंस्साकारले ३७ बलमा ६७ रन र दिपक डुम्रेले ३२ बलमा ३७ रन बनाए । बलिङतर्फ एपीएफका इर्साद अहमदले १८ रन खर्चेर ५ विकेट, दिवान पुनले १७ रन खर्चेर एक विकेट लिएका थिए । यस्तै पहिले ब्याटिङ गरेको एपीएफका दिपक बोहोरा (ए)ले ४७, अमसिंह रौटेलाले २५ र सुमित महर्जनले २८ रन बनाए ।
बलिङतर्फ चितवनका दिपेश कंडेलले २ र विपिन खत्रीले एक विकेट लिए । फाइनल खेलको म्यान अफ दि म्याच चितवनका शुभ कंस्कार चुनिए । उनले पाँच हजार रुपैयाँ हात पारे ।
प्रतियोगिताको विजेताले चार लाख नगद र ट्रफि हात पारेको छ । यस्तै उपविजेता एपीएफले दुई लाख र तृतीय भएको त्रिभूवन आर्मी क्लबले एक लाख रुपैयाँ प्राप्त गरेका छन् ।उनीहरुलाई भरतपुर महानगरपालिकाका उपप्रमुख चित्रसेन अधिकारीले ट्रफि र नगद प्रदान गरे । प्रतियोगितामा म्याद अफ दि म्याच आर्मीका त्रित राज दास घोषित भए ।
उनले प्रतियोगिता अवधिभर अलराउण्डर प्रर्दशन गर्दै ३१० र ६ विकेट लिएका थिए । उनले १५ हजार रुपैयाँ नगद प्राप्त गरे । यस्तै वेस्ट ब्याटरमा ३१८ रन बनाएका दिल्ली वन्र्डसका महमद कैफ र १६ विकेट लिएका चितवनका दिपेश कंडेल वेस्ट बलर चुनिए । उनीहरुले १०/१० हजार रुपैयाँ हात पारे ।
एपीएफ, दिल्ली वन्र्डस र पुलिसलाई पराजित गर्दै चितवन सेमिफाइनलमा पुगेको थियो । लिग चरणमा आर्मीसँग पराजित भएको चितवनले सेमिफाइनलमा आर्मीलाई नै पराजित गर्दै फाइनलमा पुगेको थियो । प्रतियोगितामा भारतका दुई टिम सहित छ टिमको सहभागिता रहेको थियो ।
