चितवन, कात्तिक २८-
प्राविधिक तथा व्यावसायिक शिक्षामा लगातार बढ्दै गएको अव्यवस्था र सरकारी बेवास्ताप्रति आपत्ति जनाउँदै लोकतान्त्रिक विद्यार्थी संघ चितवनले CTEVT सम्बन्धी नीतिगत सुधारको माग गरेको छ ।
विद्यार्थी संघ चितवनले एक प्रेस विज्ञप्ति जारी गर्दै विभिन्न मागहरु गरेका हुन् ।
संघले CTEVT अन्तर्गत सञ्चालन भइरहेका शैक्षिक कार्यक्रमहरू, विशेषगरी स्वास्थ्य, कृषि, पशु विज्ञान, इन्जिनियरिङ र अन्य प्राविधिक तहका पाठ्यक्रममा सरकारले ध्यान नदिँदा विद्यार्थीहरू गम्भीर समस्या भोग्नु परेको भन्दै तत्काल सुधारका कदम चाल्न आग्रह गरेको छ। विज्ञप्तिमा हाल प्रविधिक शिक्षा क्षेत्र अस्तव्यस्त बनेको र परीक्षा व्यवस्थापनदेखि प्रशासनिक प्रक्रिया सबैमा अव्यवस्था बढ्दो क्रममा रहेको उल्लेख गरिएको छ।
संघले विभिन्न माध्यमबाट निरन्तर माग गरे पनि CTEVT र सरकार बेपरवाह बनेको आरोप लगाउँदै प्राविधिक शिक्षामा ‘त्वरित सुधार’ आवश्यक रहेको जनाएको छ। विशेष गरी, डिप्लोमा तेस्रो वर्षको परीक्षा नियमित सञ्चालन, ८० लाख विद्यार्थीलाई प्रभावित पार्ने ढिलासुस्ती रोक्ने, Skill Mapping अनिवार्य लागू गर्ने, उपकरण तथा स्रोत अभाव तत्काल समाधान गर्ने लगायतका मागहरू प्राथमिकताका रूपमा अघि सारिएका छन्।
यस्तै, संघले CTEVT कार्यक्रम विस्तारमा पारदर्शिता, विद्यार्थी रोजगारीमुखी तालिमको प्रभावकारी व्यवस्था, One Door TVET System लागू तथा Basket Funding प्रणाली सञ्चालन गर्न माग गरेको छ।
प्रेस विज्ञप्तिमा चेतावनी दिँदै भनिएको छ कि — यदि सरकारले ७२ घण्टाभित्र माग सम्बोधनमा पहल नगरे विद्यार्थीहरू आन्दोलनमा जान बाध्य हुनेछन्। चितवनका विभिन्न प्राविधिक विद्यालय बन्द हुने अवस्था आएपछि विद्यार्थीहरूको भविष्य संकटमा पर्ने भन्दै तत्काल सम्बोधनको आवश्यकता औंल्याइएको छ।
