त्यस्तै राप्रपाका प्रमुख सचेतक ज्ञानेन्द्र शाहीले पनि कुलमानलाई हटाउन लागिएकोमा विरोध गर्दै ६ महिना कार्यकाल बाँकी रहँदै हटाए सदन र सडक आन्दोलन समेत गर्न पछि नपर्ने चेतावनी दिए । अँध्यारो नेपालबाट उज्यालो नेपाल बनाउने प्राधिकरणका कार्यकारी निर्देशक घिसिङलाई हटाउने र शून्य अङ्क दिने काम गरेर सरकारले षड्यन्त्र गरेको शाहीको आरोप छ ।

‘कुलमानलाई हटाउने जुन प्रपञ्च गरिँदैछ र मन्त्रिपरिषद्ले निर्णय हुँदैछ भन्ने सुन्नमा आएको छ । यदि कुलमानलाई हटाइयो भने, ‘नेपाललाई अन्धकारमा धकेलेको भनेर सडक र सदन दुवैबाट आवाज उठ्छ’, शाहीको भनाइ छ । त्यस्तै माओवादीका अर्का सांसद सूर्यमान तामाङ दोङले प्राधिकरणलाई नाफामा लैजाने कुलमानलाई हटाउन सरकारले गरेको हर्कतप्रति नेपाली जनताले चासो देखाए भने के हुनसक्छ ? भनेर प्रश्न गरे ।

‘विद्युत् प्राधिकरणलाई निरन्तर नाफामा लैजान मिहिनेत गर्ने कुलमानलाई सरकारले किन देख्न सकेन ?’, प्रश्न गर्दै दोङले भने, ‘सरकारले कुलमानलाई हटाउन गरेको जुन खालको हर्कत गरेको छ त्यसप्रति नेपाली जनताले चासो देखाए भने के हुनसक्छ ?’

विपक्षीको माग अनुसार सभामुख देवराज घिमिरेले विपक्षीहरूले उठाएको विषयबारे सरकारलाई जवाफ दिन निर्देशन दिएका हुन् ।

‘आजको बैठकमा सबै प्रतिपक्षहरूबाट राखिएको विषय तथा माननीय सदस्यहरूले आकस्मिक, शून्य समय र विशेष समयमा उठाउनुभएका विषयमा समेत प्रतिनिधिसभा नियमावलीको नियम १५ को उपनियम २ प्रति सम्बन्धित माननीय मन्त्रीहरूको म गम्भीर ध्यानाकर्षण गराउँदछु । साथै उठेका विषयहरूमा सभालाई जानकारी गराउन म निर्देश गर्दछु,’ सभामुख घिमिरेले निर्देशन छ ।