तनहुँ, असोज २२-
श्रीमतीको हत्या आरोपमा श्रीमान् पक्राउ परेका छन् । तनहुँको भानु नगरपालिका–१ बोटेगाउँमा स्थानीय ३६ वर्षीया पूर्णमाया बोटेको हत्या आरोपमा उनका श्रीमान् ४० वर्षीय पञ्चबहादुर बोटे पक्राउ परेका हुन् ।
सोमबार राति पत्नीको हत्या गरी फरार भएका बोटेलाई आज गोरखाको पालुङटार नगरपालिका–७ बिरुवाटारबाट पक्राउ गरिएको प्रहरीले जनाएको छ । पञ्चबहादुरले श्रीमतीको घाँटी डोरीले कसेर हत्या गरेको आशंका प्रहरीले गरेको छ ।
पञ्चबहादुरले छिमेकीलाई आफ्नो श्रीमतीको मृत्यु भयो भनी घरको साँचो फालेर भागेको प्रहरीले जनाएको छ ।
छिमेकीले प्रहरीलाई खबर गरी ढोका खोलेर हेर्दा पूर्णमायाको शव भेटिएको थियो । मृतकको घाँटीमा निलडाम रहेको र नजिकै डोरी भेटिएको प्रहरीले जनाएको छ ।
शव परीक्षणका लागि दमौली अस्पताल पठाइएको र घटनाबारे अनुसन्धान भइरहेको प्रहरी नायब उपरीक्षक अशोक थापाले जानकारी दिए । रासस
