– हिरालाल आचार्य ‘डायमण्ड’
चितवन, असोज १० –
कृषि तथा वन विज्ञान विश्वविद्यालय रामपुर चितवनमा विद्यार्थीबीच भएको झड्पका विषयमा नेपाल विद्यार्थी संघ चितवनले राँके जुलुस निकालेको छ । आज साँझ वीरेन्द्र क्याम्पस चोकमा पूर्व पश्चिम राजमार्गमा नेविसंघले राँके जुलुस निकालेको हो ।
कृषि तथा वन विज्ञान विश्वविद्यालय रामपुर चितवनमा गत भदौ १३ गते विद्यार्थीहरु बीच झड्प भएको थियो । कांग्रस निकट विद्यार्थी संगठन नेविसंघ र एमाले निकट विद्यार्थी संगठन अनेरास्ववियुमा आवद्ध विद्यार्थीबीच भएको झडपमा नेविसंघका ४ र अनेरास्ववियुका ३ जना विद्यार्थी घाइते भएका थिए । नेविसंघमा आवद्ध दुई विद्यार्थीको अझै पनि काठमाडौंमा उपचार भइरहेको छ ।
घटनापश्चात विश्वविद्यालय ठप्प छ । दोषीलाई कारवाहीको माग गर्दै नेविसंघले विश्वविद्यालयमा तालाबन्दी समेत गरेको छ । घटनामा दोषी रहेको आरोपमा अनेरास्ववियुका ३ जनालाई प्रहरीले नियन्त्रणमा लिएर अनुसन्धान गरिरहेको छ । नेविसंघमा आवद्ध विद्यार्थीले दिएको उजुरीका आधारमा ३ जनालाई प्रहरीले नियन्त्रणमा लिएको हो । यता अनेरास्ववियुमा आवद्ध विद्यार्थीहरुले सरकारी वकिलको कार्यालय मार्फत उपचार गराइरहेका नेविसंघका विद्यार्थीलाई दोषी देखाउँदै अर्काे उजुरी समेत हालेका छन् । यसले विवाद थप लम्बिने देखिन्छ ।
दोषीलाई कारबाहीमा ढिलासुस्ती गरिएको र उन्मुक्ति दिन खोजिएको भन्दै राजमार्गमा नेविसंघले आज साँझ राँके जुलुस निकालेको हो । राँके जुलुस निकाल्दै नेविसंघले नाराबाजी समेत गरेको छ । केही समय पूर्व पश्चिम राजमार्ग नै अवरुद्ध गरेर नेविसंघ आन्दोलनमा उत्रिएको हो ।
नाराबाजीका क्रममा विश्वविद्यालयका रजिष्ट्रार राजीनामा दे, दोषीलाई कारबाही गर लगायतका नारा लगाइएको थियो । प्रदर्शनपछि भएको कोण सभालाई नेविसंघ वीरेन्द्र बहुमुखी क्याम्पस इकाई समिति अध्यक्ष कुमार जोशी र शहिद स्मारक कलेज नेविसंघ इकाइ अध्यक्ष दिनेश तामाङले संवोधन गरेका थिए ।
सम्बन्धित समाचार : थप जानकारीका लागि यो समाचार पनि पढ्नुहोस् ।
रामपुर विश्वविद्यालय झड्प : किन लडे विद्यार्थी, को हो दोषी ? डीन र प्राध्यापकले नै उक्साएका हुन त !
रामपुर विश्वविद्यालय झड्प : किन लडे विद्यार्थी, को हो दोषी ? डीन र प्राध्यापकले नै उक्साएका हुन त !
