दैलेख, २९ भदौ
दैलेखस्थित नारायण क्याम्पसको स्वतन्त्र विद्यार्थी युनियनको निर्वाचन सम्पन्न भएको छ । निर्वाचन शुक्रबार सम्पन्न भएको हो ।
शनिवार सम्पन्न मतगणनामा नेकपा एमालेनिकट अनेरास्ववियुको प्यानलै निर्वाचित भएको छ ।गठबन्धनलाई पछि पार्दै अनेरास्ववियुका हिमवहादुर बस्नेत ९ मतको अन्तरमा सभापति निर्वाचित भएका हुन् ।
बस्नेत १६६ मत पाएर सभापति पदमा बिजयी हुँदा उनका प्रतिस्पर्धी नेविसंघका उम्मेदवार बिष्णु प्रसाद कोइरालाले १५७ मत पाएका छन् ।
त्यस्तै सचिवमा पनि अनेरास्ववियुका फिलिप सिंह १९२ मतसहित विजयी भएका छन् । उनका प्रतिस्पर्धी गठबन्धनबाट नेकपा एसनिकट अनेरास्ववियूका टेकराज बुढाले १२७ मत पाएका छन् ।
स्ववियुको कोषाध्यक्षमा अनेरास्ववियुकी शुष्मा शाही १७२ मतसहित बिजयी भएकी छन् भने प्रतिस्पर्धी गठबन्धनबाट अखिल क्रान्तिकारीका उम्मेदवार भुवन प्रसाद पाण्डेले १४१ मत पाएका छन् । सदस्यहरु पनि अनेरास्ववियुबाटै पुष्पकमल अधिकारी र पुर्णिमा रानामगर निर्वाचित भएका छन् ।
निर्वाचनमा अनेरास्ववियुविरुद्ध नेपाली कांग्रेस, नेकपा माओवादी केन्द्र, नेकपा एस, विप्लनिकट नेकपा र राप्रपानिकट विद्यार्थी संगठनहरुले गठबन्धन बनाएका थिए ।
