टोकियो, १३ भदौ
यतिबेला जापान एक दशकयताकै सबैभन्दा शक्तिशाली ताइफुको चपेटामा परेको छ । शानशान ताइफुका कारण मंगलबार अबेर राति एकै परिवारको तीन जनाको मृत्यु भएको थियो ।
अहिलेसम्म ताइफुले गर्दा कम्तिमा ८४ जना घाइते भएको सरकारी समाचार च्यानल एनएचकेले आफ्नो समाचारमा भनेको छ । ५० लाखभन्दा जनालाई सुरक्षित स्थलमा जान भनिएको छ । तर अहिलेसम्म कति जना सुरक्षित स्थलमा गए भन्ने चाँहि स्पष्ट जानकारी आइसकेको छैन ।
ताइफुका कारण दक्षिण जापानमा आउने र जाने ७०० भन्दा धेरै हवाई उडान रद्द भएका छन् । राजमार्गका ८० भन्दा बढी खन्डमा सवारी आवागमन अवरुद्ध भएको छ । २ लाख ३० हजारभन्दा धेरै घर बिजुलीबत्ती बिहिन अवस्थामा छन् । क्युशुमा मुसलधारे वर्षा भइरहेको छ । त्यहाँ प्रतिघन्टा २५२ किमिका दरले आँधी चलेको बताइएको छ ।
ताइफुका कारण भारी वर्षा हुने भविष्यवाणी मौसम विभागले गरेको छ । दक्षिण क्युशुमा भोली बिहानसम्मको २४ घन्टामा १ हजार २०० एमएम (४३ इञ्च) वर्षा हुने बताइएको छ । ताइफु यतिबेला उत्तरतर्फ सर्दै गइरहेको छ ।
