भरतपुर, १० फागुन
गुरुकुल माविले व्यवस्थापन सङ्कायका कक्षा १२ का करिव १३७ जना भन्दा बढी विद्यार्थीलाई उद्यमशील सोच विकास गर्ने उद्देश्यका साथ ‘लिन स्टार्टअप्स र बिजनेस मोडल क्यानभाष’ शीर्षकमा कार्यक्रम सञ्चालन गरेको छ । विद्यार्थीहरुलाई किताबी ज्ञान सँगैसँगै प्रयोगात्मक सिप सिकाउनका लागि सो कार्यक्रम आयोजना गरिएको गुरुकुल माविका व्यवस्थापन सङ्कायका कार्यक्रम संयोजक सुशील रेग्मीले जानकारी दिए ।
यस कार्यक्रममा श्रोत व्यक्तिको रुपमा उद्यमशीलता विषयका अध्यापक तथा बिआईसी स्टार्टअप्सका उपनिर्देशक प्रेम गैरेले सहजकर्ताको भूमिका निर्वाह गरेका थिए । कार्यक्रममा विद्यार्थीहरुलाई उद्यमशीलता र स्टार्टअप्स भनेको के हो, उद्यमशील सोच भनेर के बुझिन्छ, लिन स्टार्टअप्स भनेको के हो, विजनेस मोडल क्यानभाष भनेको के हो र कसरी बनाईन्छ र उद्यमशीलतालाई व्यवहारिक रुपमा कसरी लैजान सकिन्छलगायतका विषयमा जानकारी दिईएको थियो । यस विषयको ज्ञान र उदाहरणहरु दिएर उद्यमशीलताको क्षेत्रमा उदाएका नवीन अवसरहरुबाट लाभ लिनको लागि विद्यार्थीलाई सबल कसरी बनाउने भन्नेमा यस कार्यक्रम केन्द्रित रहेको गुरुकुल माविका सहप्राचार्य प्रतीक ढकालले बताए ।
उद्यमशीलता साथसाथै प्रविधिको उदयले गर्दा नयाँ नयाँ अवसरहरु सिर्जना भईरहेको कुरालाई पनि कार्यक्रममा जोड दिईएको थियो । बिआईसी स्टार्टअप्सका कार्यक्रम सहायक नितेशकुमार सिङले आफ्नो विद्यार्थी जीवनको अनुभव साट्दै हाल ग्राफिक्स डिजाईनको लागि प्रसिद्ध रहेको क्यान्भा भन्ने एप कसरी चलाउने भनेर तालिम दिएका थिए ।
कार्यक्रमका सहजकर्ता प्रेम गैरे र नितेशकुमार सिङलाई सम्मान गरि कार्यक्रम समापन गरिएको थियो ।
