भरतपुर, १५ पुस
गृहमन्त्रीको राजिनामा माग गर्दै सरकारविरुद्द राष्ट्रिय स्वतन्त्र पार्टी (रास्वपा) चितवनले बिरोध प्रदर्शन गरेको छ । आइतबार भरतपुरको चौबिसकोठीमा रास्वपा चितवनले बिरोध प्रदर्शन गरेको हो ।
प्रदर्शनमा सहभागीले ‘जनाता मार्न पाइदैन’, नालायक गृहमन्त्री राजिनामा दे’, ‘हत्यारा सरकार राजिनामा दे’ लगायत नारा लेखिएका प्लेकार्ड प्रदर्शन गरेका थिए ।
सो पार्टीको चितवनका संयोजक कृष्ण प्रसाद भुसालले युवाले गरेको प्रदर्शनमा गोली चलाउनु दुःखद भएको बताए । उक्त घटनामा गृहमन्त्रीले राजीनामा दिनुपर्ने उनले माग गरे।
पार्टीका केन्द्रिय सदस्य राजन गौतमले सरकार एकअर्काको स्वार्थमा टिकेको बताए । उनले सरकार ढल्ने चेतावनी समेत दिएका थिए ।
उक्त प्रदर्शनमा रास्वपाका केन्द्रिय सदस्य राजन गौतम, जिल्ला संयोजक कृष्ण प्रसाद भुसाल,भरतपुर महानगर कमिटिका संयोजक सिता ज्ञवाली, भरतपुर महानगरका संगठन बिभाग प्रमुख दिवाकर राज श्रेष्ठ, पार्टीका नेता धुर्व केसी, र्यापिड एक्सन टिम (र्याट) चितवन, वडा कमिटि ,प्रदेश कमिटि लगायतका नेता तथा कार्यकर्ताहरुको उपस्थिति रहेको थियो ।
कोरिया जानका लागि रोजगार अनुमति प्रणाली (ईपीएस) परीक्षा दिन नपाएको आक्रोशमा पुस १३ गते ललितपुरको बालकुमारीमा भएको आन्दोलनमा प्रहरीले गोलि चलाएको थियो । उक्त आन्दोलनमा दैलेख घर भएका २३ बर्षिय सुजन रावत र डोटी घर भएका २१ बर्षिय विरेन्द्र शाहको मृत्यु भएको थियो ।
प्रदर्शनकारीले भौतिक पूर्वाधार तथा यातायातमन्त्री प्रकाश ज्वालाको बा २ झ ५८६१ नम्बरको गाडीमा आगजनी समेत गरेका थिए ।
