चितवन, २७ मङ्सिर
चार जिल्ला सम्मिलित भिजिट भरतपुर टि-ट्वान्टी सिरिजको उपाधी मकवानपुरले उचालेको छ । भरतपुर १५ स्थित गौतम बुद्ध अन्तर्राष्ट्रिय क्रिकेट रंगशालाको नमुना मैदानमा भएको फाइनल खेलमा चितवनलाई ५ विकेटले हराउँदै मकवानपुरले उपाधी उचालेको हो ।
चितवनले दिएको १ सय २४ रनको लक्ष्य मकवानपुरले १९ औं ओभरको अन्तिम बलमा भेट्टायो । मकवानपुरलाई जिताउन सुभ कंसाकारले सर्वाधिक २७ रन बनाए । २३ बलमा २ चौका र २ छक्कासहित २७ रन बनाएका उनी दानिस इकबालको बलमा एलबीडब्लु धरापमा परे ।
तक्षक सिंखडाले २४, रिजन ढकालले नटआउट २३, र सक्षम बस्ताकोटीले २० रन जोड्दै मकवानपुरको जित सुनिश्चित गरे ।
बलिङमा चितवनका दिवस आचार्य र दिपेश श्रेष्ठले २/२ तथा दानिस इकबालले एक विकेट लिए ।
त्यसअघि टस जितेर ब्याटिङ रोजेको चितवनले निर्धारित २० ओभरमा ९ विकेट गुमाउदै १ सय २३ रन बनायो । ७ ओभरमा ३२ रन जोड्दा सुरुआती ४ विकेट गुमाएको चितवनको पारी त्यसपछी सम्हालिएको थियो ।
चितवनका लागि क्रिजन गुरुङले सर्वाधिक ३१ रन बनाए । २२ बलमा २ चौका र २ छक्का प्रहार गरेका उनी समीर चौलागाईको बलमा क्लिन बोल्ड भए । १९ बलमा २० रन बनाएका दिपेश श्रेष्ठ रोहित ठाकुरको बलमा बोल्ड आउट भए ।
बलिङमा मकवानपुरका समिर चौलागाईले ३, रोहित ठाकुरले २ तथा रिजन ढकाल, असिम श्रेष्ठ र साकार गजुरेलले समान १ विकेट लिए । १ विकेटसहित नटआउट २३ रन बनाएका मकवानपुरका रिजन ढकाल खेलको प्लेयर अफ द म्याच बने ।
विधागततर्फ प्रतियोगिताको वेष्ट बलर १३ विकेट लिएका मकवानपुरका रिजन ढकाल भए । वेष्ट ब्याटरमा ९५ रन बनाएका चितवनका प्रतिक श्रेष्ठ चुनिए । प्लेयर अफ द सिरिज मकवानपुरका रिजन ढकाल बने । वेष्ट क्याचको उपाधी पर्साका सम्साद मन्सुरीले पाए ।
प्रतियोगिताका उप-विजेताले मेडल र प्रमाणपत्र प्राप्त गर्दा विजेताले ट्रफी, मेडल र प्रमाणपत्र प्राप्त गरे । विजेतालाई भरतपुर महानगरपालिकाका प्रमुख प्रशासकीय अधिकृत नरेन्द्र कुमार रानाले ट्रफी र मेडल हस्तान्तरण गरे ।
चितवन जिल्ला क्रिकेट संघले आयोजना गरेको प्रतियोगिता आगामी दिनमा पनि निरन्तरता दिदै जाने संघका अध्यक्ष सुदीप पियाले बताए ।
