– हिरालाल आचार्य ‘डायमण्ड’
चितवन, मंसिर २२ –
विदेशबाट फर्केका एक युवाले लमजुङ्गको सुन्दरबजार नगपालिका १ कुन्छाको एउटा पाखामा ड्रागन खेती गरेर राम्रो उत्पादन गरेका छन् ।
२ वर्षअघि ६ रोपनी जग्गामा १००० वटा ड्रागन फ्रुटका बेर्ना रोपेर खेती सुरु गरेका विदुर गौलीले ड्रागनको सफल उत्पादन गरेका छन् । आगामी वर्ष थप ७२ रोपनी जग्गामा ४००० विरुवा रोप्ने गरी गौलीले तयारी थालेका छन् ।
इन्टरनेटमा खोजेर ड्रागन खेतीबारे अध्ययन गरी गौलीले खेती सुरु गरेका हुन् । कतारबाट फर्किएर गौलीले आफ्नै पाखा पखेरामा भविष्य खोजिरहेका छन् । खरिका ड्रागन फ्रुट खेती नामक फार्म नै खोलेर गौली कृषि कर्ममा होमिएका हुन् ।
भियतनामबाट रातो प्रजातीको विरुवा ल्याएर लगाएका विदुरले पहिलो लट बिक्रि गरिसकेका छन् । गौलीले दोश्रो लटको ड्रागन बेचेपछि लगानी उठ्ने अपेक्षा राखेका छन् । ६०० रुपैयाँ किलोमा ड्रागन र २५० प्रतिगोटाका दरले विरुवा बेचिरहेका छन् ।
उनले उत्पादन गरेको ड्रागन स्थानीय बजारमै बिक्री हुने गरेको छ । विदुरलाई उनकी श्रीमतीले सघाउने गर्छिन । गोड्ने बेलामा धेरै जना चाहिने हुँदा विदुरले खेताला लगाउने गरेका छन् ।
५ लाखमा टनेल बनाएका विदुरले त्यसमा २ लाख अनुदान कृषि ज्ञान केन्द्रबाट पाएका छन् । त्यो बाहेक अन्य सहयोग उनले राज्यबाट पाउन सकेका छैनन् । उक्त टनेलमा ड्रागनका विरुवा हुर्कँदै छन् ।
यहाँ उत्पादन भएको ड्रागन अन्यत्र भन्दा निकै स्वादिष्ट रहेको विदुर बताउँछन् । प्राङ्गारिक मल बाहेक उनले अन्य मल हाल्ने गरेका छैनन् ।
आधुनिक तरिकाले अन्नबालीको खेती गरे पहाडका पाखा पखेराबाटै राम्रो आम्दानी गर्न सकिने विदुर गौली बताउँछन् । ड्रागन खेती गर्न चाहनेहरु आफूकहाँ आए आवश्यक सल्लाह दिनुका साथै र विरुवा उपलब्ध गराउने विदुरको भनाइ छ ।
खेती हुने पहाडका पाखा पखेराहरु विस्तारै बाझिदै गएका छन् । खेती गर्ने जोश र जाँगर भएका युवाहरु स्वदेशमा केही पनि नदेखेर विदेशिने क्रम बढ्दै गएको छ । तर विदेशको भूमिबाट फर्केर आफ्नै माटोमा ड्रागन खेती गरी राम्रो आम्दानी गरेर विदुर गौलीले गतिलो उदाहरण प्रस्तुत गरेका छन् ।
