धेरै नागरिकहरूले ज्यान गुमाएपछि अन्तर्राष्ट्रिय शक्तिहरुले इसराइलमाथि गजामाथिको आक्रमण रोक्न दवाब दिएका छन्। गजामा हमासकै कारण प्यालेस्टिनियनहरूले ज्यान गुमाएको तर्क इसराइलको छ।

उसले जहाँ मानिसहरूको आवादी बढी हुन्छ त्यही क्षेत्रमा हमासले आफ्नो कमान्ड सेन्टर स्थापना गरेको आरोप लगाउँदै आएको छ।

पछिल्लो समय अस्पताल र त्यसनजिकका संरचनमुनि सुरूङ बनाएर त्यहीँबाट हमासले सैन्य गतिविधि गरिरहेको दाबी गर्दै इसराइली सेना गजाका अस्पतालहरूभित्रै प्रवेश गरिरहेका छन्।

विद्युत् र इन्धन नहुँदा गजाका अधिकांश अस्पताल बन्द भएका छन् भने त्यहाँ रहेका बिरामीहरूको उपचार हुन कठिन भएको छ। गजाको सबैभन्दा ठूलो अस्पताल अल-सिफा अस्पतालमा पनि इन्धन् विद्युत् नहुँदा त्यहाँ उपचाररत नवजात शिशुहरूको मृत्यु भएको खबर अन्तर्राष्ट्रिय सञ्चारमाध्यमहरूमा सार्वजनिक भएको थियो।

चर्को दबावपछि इसराइलले नागरिकहरूलाई भाग्नका लागि दैनिक चार घन्टाको समय दिन सहमत भएको थियो। तर, सहमति तोड्दै इसराइली सैनिकले शनिबार गजा क्षेत्रमा हवाइ आक्रमण गरेको रोयटर्सले उल्लेख गरेको छ।

नागरिकहरूलाई भाग्नका लागि दिइएको समयमा इसराइलले हवाई आक्रमण गरेको र त्यसबाट कम्तिमा ३२ जना प्यालेस्टिनियनहरुको मृत्यु भएको रोयटर्सले जनाएको छ।

इसराइलले हमासले बन्धक बनाएका २४० जनालाई विनासर्त छाड्नुपर्ने बताएको छ। त्यसो नभएसम्म गजामा आक्रमण भइरहने प्रधानमन्त्री बेन्यामिन नेतन्याहुले बताएका थिए।

अक्टोबर ७ मा हमासले इसराइलमा आक्रमण गर्दा त्यहाँ १ हजार २ सय मानिसहरू मारिएका थिए भने २४० जनालाई बन्धक बनाइ हमासले गजा पुर्‍याएको थियो। एजेन्सी