काठमाडौ, ३ भदौ
बेलायतमा लुसी लेटबी नाम गरेकी ३३ वर्षीया नर्सले ७ नवजात शिशुको हत्या गरेकी छन् । उनले अन्य ७ बच्चालाई मार्ने प्रयासमा हानि पुर्याएकी विदेशी मिडियाले लेखेका छन् । सीएनएनका अनुसार, आफू काम गर्ने अस्पतालमै उनले यस्तो अपराध गरेकी हुन् । ‘अहिले उनी देशकै सबैभन्दा खराब शिशु सिरियल किलर बनेकी छन’, सीएनएनको समाचारमा भनिएको छ ।
इंग्ल्याण्डको उत्तरी म्यानचेस्टर क्राउन कोर्टका अनुसार, लेटबी रेखदेखका लागि आएका ७ बच्चाहरूको हत्या र अन्य ७ लाई मार्ने प्रयासमा दोषी पाइएकी छन् । अन्य केही बच्चाको पेटमा हावा भरेर, अत्यधिक दूध पिलाएर शारीरिक आक्रमण गरेर, इन्सुलिन विष दिएर उनले मार्ने प्रयास गरेको समाचारमा जनाइएको छ ।
बेलायतको पीए मिडिया समाचार एजेन्सीका अनुसार, ‘चाइल्ड ई’ को रूपमा पहिचान गरिएको बच्चालाई लेटबीले रगतमा हावा दिएर मारिन् । अर्को दिन उसका जुम्ल्याहा भाइ, ‘चाइल्ड एफ’लाई इन्सुलिन विष दिएर मार्ने प्रयास गरेकी थिइन् ।
घटना काउन्टेस अफ चेस्टर हस्पिटलको हो । लेटबी अस्पतालको शिशु युनिटमा तीन वर्षयता काम गरिरहेकी थिइन् । लेटबीमाथि बच्चा हत्या र आक्रमणको शंका लागेर उनकै विभागका प्रमुख डाक्टरले अस्पताल प्रशासनलाई पहिल्यै जानकारी पनि गराएका थिए ।
तर, अस्पताल व्यवस्थापनले लुसीविरुद्ध लागेका आरोपमाथि छानबिन गर्नुको साटो डाक्टरलाई चुप गराउने कोसिस गरेकाे बीबीसीले लेखेकाे छ । प्रहरीसामु घटना पुग्दासम्म ७ शिशुको हत्या भइसकेकाे थियाे ।
गिरफ्तार हुनुअघि नर्स लुसी ३ वर्ष सोही अस्पतालमा काम गरिरहिन् । नवजात शिशु विभागका मुख्य डाक्टर स्टिफेन ब्रेयरेले अक्टुबर २०१५ मै ‘नर्सले नै बच्चाहरूको हत्या गरेको हुनसक्ने’ चेतावनी दिएका थिए ।
तर, यसमा कुनै कारबाही भएन । पछि लुसीले ५ अन्य नवजातहरूमाथि आक्रमण गरिन् । यीमध्ये दुई जनाको मृत्यु भयो ।
पहिले ५ नवजातको मृत्यु जुनदेखि अक्टुबर २०१५ को बीचमा भयो । अन्तिम २ बच्चाको मृत्यु जुन २०१६ मा भएको थियो । नवजातको मृत्यु हुँदा ड्युटीमा लुसी लेटबी रहेको देख्दा छानबिनकर्ताहरू छक्क परेका थिए ।
बच्चालाई नियतवश मारे पनि उनले आफ्ना सहयोगीलाई मृत्युको कारण प्राकृतिक भएको बताउँथिन् । पीडित परिवारले यस्तो भइरहेको वा हुन्छ भनेर आफूहरूले कहिल्यै कल्पनासमेत नगरेको बताएका छन् ।
‘मैले मारेकी हुँ’
छानबिनको सिलसिलामा सन् २०१८ र २०१९ मा गरी दुईपल्ट प्रहरीले लेटबीलाई गिरफ्तार गरेको थियो । नोभेम्बर २०२० मा फेरि उनलाई पक्राउ गरियो । यसपल्ट लेटबीले आफ्ना पतीको खोजीका क्रममा लेखेको एक नोट अधिकारीहरूले फेला पारे ।
नाेटमा यस्ताे लेखिएकाे थियाे, ‘म बाँच्न लायक छैन । मैले उनीहरूलाई जानेबुझेर मारिदिएँ । किनकि म उनीहरूको रेखदेख गर्नमा सक्षम छैन’, उनले एक मेमोमा लेखिन् र अर्कोमा जोडिन्, ‘म एक भयानक दुष्ट व्यक्ति हुँ’, अझै ठूलो अक्षरमा, ‘म दुष्ट हुँ, मैले यस्तो गरेँ ।’
