चितवन, वैशाख ४ –
राष्ट्रिय स्वतन्त्र पार्टीका महामन्त्री मुकुल ढकालका चालक कालुराम राजवंशीलाई प्रहरीले नियन्त्रणमा लिएको छ ।
सभापति रवि लामिछानेको सवारी चालक शम्भु भनिने दिलबहादुर थापा छतबाट खसेको घटना अनुसन्धानका लागि उनलाई नियन्त्रणमा लिइएको चितवन प्रहरीले जनाएको छ ।
दिलबहादुर थापासँगै सुतेका हुनाले कालुराम राजवंशीलाई लाई प्रहरीले नियन्त्रणमा लिएर अनुसन्धान थालेको हो ।
अहिले घटनाको अनुसन्धान भइरहेको र आत्महत्या प्रयास हो वा अरु कुनै कारणले यस्तो भएको हो भन्ने बारे खुलि नसकेको प्रहरीले जनाएको छ ।
भरतपुर महानगरपालिका ११ मा रहेको लामिछानेको भाडाको घरको तेस्रो तलाबाट लामिछानेका चालक थापा खसेको सिसिटिभी फुटेजमा देखिन्छ ।
विहान करीव ४ बजेतिर थापा छतबाट खसेलगत्तै दुई जनाले उठाएको सिसिटिभी फुटेजमा देखिन्छ ।
चालक थापाको भरतपुरस्थित पुरानो मेडिकल कलेजमा उपचार भइरहेको छ । उनलाई अस्पताल ल्याएलगत्तै सबै चेकजाँच गरी टाउकोको शल्यक्रिया गरिएको छ ।
अस्पतालका अनुसार शल्यक्रियापछि थापालाई भेन्टिलेटरमा राखेर उपचार गरिएको छ । उनको अवस्था स्थिर छ ।
