– हिरालाल आचार्य ‘डायमण्ड’
चितवन, फागुन ३० –
पढाइ बिग्रन्छ की भनेर विद्यार्थी राजनीतिमा होमिन नचाहनेहरुको जमात ठूलै हुन्छ । पछिल्लो समय त विद्यार्थी नेता भनेका होहल्ला गर्ने, गुण्डागर्दी गर्नेहरुको समूह हो भन्ने भ्रम फैलिरहेको छ ।
विगतमा विद्यार्थी आन्दोलनले देशमा ठूलै परिवर्तन ल्याएको थियो । विद्यार्थी आन्दोलनबाट देशले असल नेताहरु पनि जन्मायो ।
तर पछिल्ला वर्षहरुमा विद्यार्थीहरुको रुचि राजनीतिप्रति कम हुँदै गएको अवस्था छ । यसमा थुप्रै कारणहरु होलान् । अहिले त्यता तिर नजाउँ ।
अहिले क्याम्पसमा नियमित आउने, अध्ययनशिल र जेहेनदार विद्यार्थीहरु राजनीतिमा खासै सक्रिय भएर लाग्न खोज्दैनन् । उनीहरुलाई राजनीतिले पढाइ बिगार्छ भन्ने डर हुन्छ । हुन पनि उनीहरु राजनीतिमा लागेका आफ्ना धेरै जसो सहपाठीहरु न कहिल्यै कक्षामा बसेको देख्छन् । न नियमित पास भएको थाहा नै पाउँछन् । परीक्षा दिन जाँदा घाँटी तन्काएर दायाँ बायाँ हेर्न खोज्ने, चिट चोर्न खोज्ने, यो गर्न नपाए पहिलो घण्टिमै बाहिरिने गरेको देख्छन् । हुन पनि पढेर भविष्यमा केही गर्न खोजेका विद्यार्थीले राजनीतिमा लागेका आफ्ना साथीहरुको हालत यस्तो देखेपछि कसरी राजनीतिमा लागुन ?
तर विद्यार्थी राजनीति गर्नेहरु सबै त्यस्ता पनि हुँदैनन् । अनि विद्यार्थी राजनीतिले गर्दा साँच्चै पढाइ बिग्रने पनि हैन । पढ्न चाहनेहरुलाई यसले केही फरक पार्दैन । विद्यार्थी राजनीति गरेर पनि पढाइमा सफल हुनेहरु थुप्रै छन् । त्यसै मध्येका एक ज्वलन्त उदाहरण हुन् वीरेन्द्र बहुमुखी क्याम्पस चौंथो वर्षमा अध्ययनरत हरि । विद्यार्थी राजनीति गरेर पनि टपर बन्न सफल हरि पौडेल सबैको प्रेरणाका स्रोत बन्न सक्छन् ।
बाग्लुङ्ग जैमिनी नगरपालिका ८ छिस्तिमा जन्मिएका हरिले प्लस २ सम्म उतै पढे । उनी ब्याचलर पढ्न २०७५ सालमा चितवनको वीरेन्द्र बहुमुखी क्याम्पसमा भर्ना भए ।
बीबीएस पहिलो वर्षमा भर्ना भएर अध्ययन सुरु गरेका हरिले अध्ययनसँगै विद्यार्थी राजनीतिलाई पनि सँगै अगाडि बढाए । अहिले चौंथो वर्षसम्म आइपुग्दा उनी व्यवस्थापन संकायका टपरका नामले परिचित छन् । अब उनको परिचय यतिमा मात्र सिमित रहेन । आउँदै गरेको स्वतन्त्र विद्यार्थी युनियन (स्ववियु) निर्वाचनमा सचिव पदका उम्मेद्वार भनेर कलेजमा उनको अर्काे परिचय थपिएको छ । उनी अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) को प्यानलबाट सचिव पदको उम्मेद्वार बनेका हुन् ।
कसरी टपर ?
उनले बिबिएस तर्फ अहिलेसम्म वीरेन्द्रमा कसैले पनि नल्याएको नम्बर ल्याउँदै इतिहास रचे । प्रथम वर्षमा ६९ प्रतिशत ल्याउँदै उनी पास भए । अहिलेसम्म प्रथम वर्षमा वीरेन्द्रमा कसैले पनि त्यति नम्बर ल्याएको थिएन ।
त्यसैगरी दोश्रो वर्षमा पनि आफ्नो क्षमतालाई निरन्तरता दिइरहे । यस्तो जेहेनदार विद्यार्थी आफ्नो क्याम्पसले पाएपछि क्याम्पस प्रशासन खुसी हुँदै उनलाई पूर्ण छात्रवृत्ति प्रदान गरी निशुल्क अध्ययन गर्ने अवसर प्रदान गरेको छ । आफ्नो कक्षामा टप भएको साथै अहिलेसम्मकै सर्वाधिक नम्बर ल्याएको भन्दै क्याम्पसले उनलाई पुरस्कृत पनि ग¥यो ।
तेश्रो वर्षको नतिजा कुरिरहेका हरि १५ दिनपछिको चौंथो वर्षको परीक्षाको तयारी पनि गरिरहेका छन् । सँगसँगै ५ दिनपछि हुने स्ववियु निर्वाचनमा आफूलाई सचिव पदमा निर्वाचित गराउन भन्दै भोट माग्दै चुनावमा होमिएका छन् ।
उनलाई चौंथो वर्षको परीक्षादेखि कुनै डर छैन । चौंथो वर्षसम्म आइपुग्दा हरि यतिसम्म मेधावी (ट्यालेन्ट) बने की उनले आफ्नो कक्षाका साथीहरुलाई आफैले ट्युशन पढाइदिए । निःशुल्क ट्युशन पढाएका हरिले साथीहरुलाई सिकाएनन् मात्र पैसा पनि जोगाइदिए ।
आफूले चुनाव जितेमा विद्यार्थीलाई उद्यमशिलता तर्फ जोड्न निशुल्क प्राविधिक तालिमको व्यवस्था गर्न पहल गर्ने, प्रशासन, पुस्तकालय तथा अव्यवस्थित कक्षा कोठालाई व्यवस्थित गर्नलाई पहल गर्ने, खेल मैदानलाई व्यवस्थित बनाई नियमित खेलकुदा गराउन पहल गर्ने, विभिन्न शिर्षकका नाममा लिइँदै आएको शैक्षिक शुल्क घटाउन दबाब दिने, अनेरास्ववियुले उठाएका एजेण्डा पूरा गर्न पहल गर्नेछु भन्दै उनले विद्यार्थीहरुमाझ अहिले भोट मागिरहेका छन् ।
विद्यार्थी राजनीतिले नै आफूलाई अझै मिहिनेती र अनुशासित हुन सिकाएको भन्दै हरि आफूजस्ता जेहेनदार अरु विद्यार्थीहरुलाई पनि विद्यार्थी राजनीतिमा आउन आग्रह गरिरहेका छन् ।
– लेखक हिरालाल आचार्य ‘डायमण्ड’ वीरेन्द्र क्याम्पसमा हरि पौडेलसँगै अध्ययनरत विद्यार्थी हुन् । आचार्य चितवन आज डटकमका चितवन रिर्पोटर समेत हुन् । उनी समसामायिक विषयमा कलम चलाउने र खोज पत्रकारिता गर्ने गर्दछन् ।