काठमाडौं । काइलियन एमबाप्पेले कीर्तिमान बनाएको खेलमा पेरिस सेन्ट जर्मेन (पीएसजी)ले शनिबार राति फ्रेन्च लिग वानमा नान्टेसमाथि ४–२ को विजय हासिल गरेको छ । यससँगै पीएसजीले शीर्ष स्थानमा ११ अंकको अग्रता लिन सफल भएको छ ।
२४ वर्षे एमबाप्पेले खेल सकिन दुई मिनेट बाँकी हुँदा गोल गरेका थिए । यस गोलसँगै फ्रान्सका फरवार्ड एमबाप्पे पीएसजीबाट सबैभन्दा धेरै गोल गर्ने खेलाडी बनेका छन् । एमबाप्पेले पीएसजीबाट २०१ गोल गरेका छन् । उनले इडिसन काभानीको कीर्तिमान तोडेका हुन् । काभानीले २०० गोल गरेका थिए ।
खेलमा फाइनल सिटी बजेपछि क्लबले एक छोटो समारोहको आयोजना गरेको थियो । पीएसजीको घरेलु मैदान पार्क डेस प्रिन्सेसमा एमबाप्पेको ठूलो तस्विर राखिएको थियो।
“म अहिले जहाँ उभिएको छु, यहाँ आउन पाउनु धेरै विशेष हुन्छ । अन्तिम पटक म यही बस्ने घोषणा गर्नका लागि यहाँ उभिएको थिए । आज क्लबबाट सबैभन्दा धेरै गोल गर्ने खेलाडीको रुपमा यहाँ उभिन पाउनु सम्मानको कुरा हो,’’ एमबाप्पेले भने, ‘‘फ्रान्सको सबैभन्दा ठूलो क्लबका लागि यो ऐतिहासिक जर्सीमा खेल्न पाउनु,पीएसजीको खेलाडी हुन पाउनु सौभाग्यको कुरा हो।’’
पीएसजीले लियोनल मेसीको गोलबाट १२औँ मिनेटमा अग्रता लिएको थियो । १७औँ मिनेटमा नान्टेसका जाओइन हादीजामको आत्मघाती गोलबाट पीएसजीले अग्रता दोब्बर बनाएको थियो । ३१औँ मिनेटमा लुडोभिक ब्लासले गरेको गोलबाट नान्टेसले अन्तर कम गर्यो । ३८औँ मिनेटमा नान्टेसका इग्नाटिउस गानागोले बराबरी गोल फर्काए ।
६०औँ मिनेटमा ड्यानिलो पेरेइराले गरेको गोलबाट पीएसजीले फेरी अग्रता लियो । इन्जुरी समयमा एमाबाप्पेले अर्को गोल थप्दै पीएसजीको तीन अंक पक्का गरे ।
जितपछि पीएसजीले २६ खेलबाट ६३ अंक जोडेको छ । दोस्रो स्थानमा रहेको मार्सेले २५ खेलबाट ५२ अंक जोडेको छ । मार्सेले आज रेनेसविरुद्ध प्रतिस्पर्धा गर्नेछ । पराजित नान्टेसले २६ खेलबाट २८ अंक जोडेको छ ।
पीएसजीले अब बुधबार राति च्याम्पियन्स लिगमा जर्मन क्लब बायर्न म्युनिखसँग प्रतिस्पर्धा गर्नेछ । घरेलु मैदानमा सम्पन्न अन्तिम–१६ को पहिलो लेगमा पीएसजी १–० ले पराजित भएको थियो ।
