चितवन, फागुन ८ –
गैंडाकोट नगरपालिकाको फोहोर फाल्न प्रयोग गरिने सवारी साधनले नदी किनारमा फोहोर फालेर नदीजन्य सामग्री ओसारपसार गरिरहेको साथै नगरपालिकाले जथाभावी नदी उत्खनन् गरी डम्पिङ्ग गरिरहेको समाचार प्रसारण भएको थियो ।
सो विषयमा बुझ्न पुग्दा नगरपालिकाका मेयर मदनभक्त अधिकारीले सञ्चारकर्मी हिरालाल आचार्यमाथि दुव्र्यवहार समेत गरेका थिए ।
नगरपालिकाको अर्काे बेथिति पनि फेला परेको छ । गैंडाकोट नगरपालिकाले निकासी कर असुल्न पूर्वपश्चिम राजमार्गमा स्थापना गरेको ढाटले मनपरी ढंगले जथाभावी रकम असुली गरिरहेको पाइएको हो ।
हेरौं, चितवन आजकर्मी समेत रहेका पत्रकार – हिरालाल आचार्य ‘डायमण्ड’ तयार पारेको समाचार सामग्री :
गैंडाकोट नगरपालिकाले आर्थिक वर्ष २०७९/०८० का लागि नगरक्षेत्रभित्र कवारी कर संकलन गर्न श्री गैंडाकोट बिल्डर्स एण्ड सप्लायर्स प्रालि गैंडाकोट, (नवलपरासी–बर्दघाटसुस्तापूर्व) सँग सम्झौता गरेको छ ।
गैंडाकोटमा उत्पादन भई बाहिर निकासी हुने कवाडीजन्य २१ वटावस्तुहरुमा कर उठाउन पाउने गरी स्थापित ढाटले मनपरी ढंगले पूर्वपश्चिम राजमार्गमा गुड्ने मालबाहक सवारीसँग कर उठाइरहेको पाइएको हो ।
फिल्डमै पुगेर मालबाहक सवारी साधनमै चढि हेर्दा समेत समेत सो कुरा पुष्टि भएको छ । भैरहवाबाट धानको भुस बोकेर पोखरा औद्योगिक क्षेत्रतर्फ हिँडेको लु २ ख ५१३७ नम्बरको ट्रकसँग गैंडाकोटको ढाटले रु ३०० रुपैयाँ कर लियो । उक्त ट्रक चालक इस्लाम मियासँग भुस किनेको बिल, लैजान लागेको स्थानको कागजात सबै थियो । तर पनि गैंडाकोटमा उनले पैसा नुबुझाई जान पाएनन् । यो उक्त ढाटको कार्यक्षेत्रभन्दा बाहिर गएर लिइएको कर थियो ।
त्यसैगरी भैरहाबाटै पोखरा जान लागेको अर्काे ट्रक (लु २ ख ५१३६) सँग पनि गैंडाकोटको ढाटले ३०० रुपैयाँ असुल्यो । उक्त ट्रकका चालक बिरबहादुर श्रेष्ठसँग कहाँबाट आएको र कहाँ जान लागेको भन्ने प्रमाणित हुने आवश्यक सबै कागजात थियो ।
त्यसैगरी चितवनबाट दुम्किबास जाँदै गरेको ना ६ ख ४७४६ नम्बरको ट्रकसँग पनि गैंडाकोटको ढाटले रु ३०० रुपैयाँ करबापत भन्दै रकम असुल्यो । त्यसको केही समयपछि चितवनबाटै आएको बागमती प्रदेश ०३०० १ ख २१५५ नम्बरको ट्रकसँग भने गैंडाकोटको ढाटले रु २०० असुल्यो । ३०० मागे पनि आफूले २०० मात्र दिएको र ढाटमा कार्यरत युवाहरुले मानेको चालक नवराज घलेले बताए । यसरी असुल्नै नपाइने रकम असुलेको ढाटले रकम असुल्दा पनि मन परी तरिकाले कसैलाई कति त कसैलाई कति असुलेको पाइयो ।
त्यसैगरी अन्यत्र कर तिरिसकेको सवारी साधनलाई पनि यसअघि पटकपटक गैंडाकोटको उक्त घाटले कर असुल्ने गरेको व्यावसायीहरुले गुनासो गर्दै हामीसमक्ष कागजात पेस गरेका छन् ।
ढाटका सञ्चालक कृष्ण सिग्देलले गैंडाकोटबाट निकासी हुने २१ वटा कवाडीजन्य वस्तुहरुबाट मात्र कर लिने पाउने गरी ढाट स्थापना गरिएको स्वीकारे । तर कर्मचारीले गल्ति गरेर अरु सवारीसँग पनि कर असुलेको भन्दै जिम्मेवारीबाट पन्छिन खोजेका छन् । कर्मचारीले विगतमा पनि गल्ति गर्दा कर्मचारी फेरिएको बताउँदै उनले जति फेरे पनि कर्मचारीले गल्ति गर्न नछाडेको उनको भनाइ छ ।
यी सबै गतिविधिका बारेमा जानकार रहे पनि नगरपालिकाले दखे पनि नदेखे झैं गरिरहेको छ्र । व्यावसायीहरुले गुनासो गर्दे नगरपालिकामा निवेदनै हाले पनि समस्या समाधान हुन नसकेको गुनासो गरेका छन् ।
ढाट खोल्न अनुमति दिएको नगरपालिकाले सम्झौता अनुसार काम भए नभएको अनुगमन गर्नुपर्छ । तर नगरपालिकाबाट त्यसो नभएको पाइएको छ । यस विषयमा गैंडाकोट नगरपालिकासँग प्रतिक्रिया लिन खोज्दा गैंडाकोटका मेयर मदनभक्त अधिकारीले प्रतिक्रिया दिनै खोजेनन् । अन्य व्यक्तिहरुसँग सम्पर्क गर्दा पनि सम्पर्क हुन सकेन ।
यस विषयमा नवलपुरका प्रमुख जिल्ला अधिकारी कृष्णप्रसाद लम्सालले गैंडाकोटको उक्त ढाटले नगरपालिकाबाट निकासी हुने बस्तुहरु बाहेक अरुमा कर लिन नपाउने जानकारी आफूलाई नगरपालिकाबाट गराइएको बताए ।
पूर्वपश्चिम राजमागर्गमा गुड्ने अरु मालबाहक सवारीसाधनसँग पनि कर लिएको गुनासो आफूकहाँ आइनसकेको उनको भनाइ छ ।
व्यावसायीहरुले नगरपालिकामा पटकपटक निवेदन दिँदा पनि उक्त निवेदनका बारेमा नगरपालिकाले सिडिओलाई जानकारी नगराएको देखिएको छ । यसरी नगरपालिकाकै मौन स्वीकृतिमा नगरपालिकाले राखेको ढाटबाट अवैध कर संकलन भइरहेको स्पष्ट बुझिन्छ । अबैधरुपमा कर उठाउनु भनेको लुट्नु सरह हो । त्यसैले लुट्ने काममा नगरपालिकाले साथ दिनु नगरपालिकाको गैह्रजिम्मेवारपूर्ण काम हो ।
