– हिरालाल आचार्य ‘Diamond’
चितवन, पुष २१ –
चितवनको पूरानो मेडिकल कलेज (सिओएमएस) ले आफ्नो कलेजमा विद्यार्थी भर्ना लिएर परीक्षा भने अर्कै कलेजको नाममा दिन लगाएको भन्दै विद्यार्थीहरु आन्दोलित बनेका छन् ।
पिसिएल अन्तर्गत पर्ने एचए, नर्सिङ्ग, रेडियोग्राफि, डेण्टल हाइजिन र ल्याब टेक्निशियनमा विद्यार्थीहरु भर्ना लिएर पढाइरहेको मेडिकल कलेजले सर्टिफिकेट भने विनायक हेल्थ केयर नामको इन्स्च्यिुटबाट दिएको हो ।
पूरानो मेडिकल कलेजमा एचए तेश्रो वर्षमा अध्ययनरत विद्यार्थी रोशन यादवका अनुसार ंयसअघि पास आउट भएका विद्यार्थीहरुले पनि विनायक हेल्थ केयरको सर्टिफिकेट पाएका थिए । तर उक्त सिर्टिफिकेटलाई नेपाल स्वास्थ्य व्यवसायी परिषद् (एनएचपिसी) ले मान्यता दिएको छैन । एनएचपिसीले पनि मान्यता नदिने शैक्षिक संस्थाको नाममा आफूहरुलाई पनि पुनः सर्टिफिकेट दिने तयारी पूरानो मेडिकल कलेजले गरेपछि आन्दोलनमा उत्रनु परेको उनी बताउँछन् ।
विद्यार्थीहरु कलेजको शिक्षालयमा तालाबन्दी गरेका छन् । त्यसपछि सडकमा नाराबाजी गर्दै उनीहरु मेडिकल कलेजको मुल अस्पतालमै आएर प्रदर्शन गरेका थिए ।
पूरानो मेडिकल कलेजको नाममा भर्ना लिने, त्यहीँ अध्ययन गराउने तर सर्टिफिकेट र मार्कसिट दिने बेलामा भने अन्य कुनै संस्थाको नामबाट दिनु पूरानो मेडिकल कलेजको लापरबाही हो । विद्यार्थीहरुलाई आफूले भर्ना लिएर अन्य कुनै संस्थामा ठेक्का लगाउने काम पूरानो मेडिकल कलेजले गरेको भन्दै विद्यार्थी संगठनहरुले पनि यसको विरोध जनाइरहेका छन् । यसबारे प्रतिक्रिया लिन खोज्दा कलेज प्रशासन बोल्न चाहेन । यसबारे कलेज प्रशासनले कुनै प्रतिक्रिया दिएको छैन ।
