चितवन, पुष १६-
चितवनको भरचपुरमा रहेको नारायणी नमुना माध्यमिक विद्यालयको हिरक महोत्सवको उद्घाटन गर्दै प्रधानमन्त्री पुष्प कमल दाहाल प्रचण्डले यो कार्यकालमा कम भाषण गर्ने बताएका छन् ।
उनले यस कार्यकालमा धेरै काम गर्ने योजना भएकाले भाषण कम बताएका हुन् ।
कार्यक्रममा बोल्दै उनले भने, ‘मैले बाँकी जीवन सुशासन र विकासकालागि समर्पित गर्ने भनेको छु । म अहिले धेरै भाषण गर्ने मनस्थितिमा छैन यो कार्यकाल । म भाषण कम काम धेरै र जनताको सेवा धेरै गरेर प्रस्तुत हुने प्रतिज्ञा गरेको छु’ ।
प्रधानमन्त्री प्रचण्डले हरेक दिन सुशासन र विकासको पक्षमा केही न केही काम गर्दै जाने प्रतिवद्धता गरेको पनि बताए ।
सुशासन कायम गर्न, भ्रष्टाचार र बेथिती अन्त्य गर्न आफूले पहिलो मन्त्रिपरिषद बैठकबाटै निर्णय गरेको भन्दै प्रधानमन्त्री प्रचण्डले जनतालाई सास्तीबाट मुक्त राख्ने आफ्नो प्रयास हुने बताए ।
उनले करिब साढे ८ मिनेटको सम्बोधनमा सुशासन र समृद्धिका बारेमा आफू समर्पित भएर काम गर्ने बताए ।
साठी वर्षअघि भरतपुरको एउटा झुप्रोमा टुकी, लालटिन र मैनटोल बालेर राति पढाउन सुरु गरिएको नारायणी नमुना माध्यमिक विद्यालय अहिले देशकै उत्कृष्टमध्ये दोस्रो हुन सफल नारायणी नमुना माध्यमिक विद्यालयको हिरक महोत्सव आज हिरक महोत्सव मनाउँदै छ ।
