चितवन, मङि्सर २९ –
सार्वजनिक खरिद अनुगमन कार्यालयले चितवनका दुई सहित १३ ठेकेदार कम्पनीलाई कालोसूचीमा राखेको छ । चितवनको भरतपुर महानगरपालिकाको आग्रहमा भरतपुर–१७ स्थित जन कन्स्ट्रक्सन प्रालिलाई एक वर्षको लागि कालोसूचीमा राखिएको छ ।
कन्स्ट्रक्सनको मुख्य संचालक जनक गुरुङ हुन् । त्यस्तै, सडक डिभिजन भरतपुरको आग्रहमा लोहनी एण्ड सन्स कन्स्ट्रक्सन प्रालिलाई पनि एक वर्षको लागि कालोसूचीमा राखिएको छ । यसको मुख्य संचालकहरु लेखनिधि लोहनी, अशोक लोहनी र दिपक ढकाल हुन् ।
सार्वजनिक खरिद ऐन, २०६३ को दफा ६३ उपदफा (१) बमोजिम काम नगर्ने ती कम्पनीलाई कालोसूचीमा राखिएको आज सार्वजनिक सूचना मार्फत जनाइएको छ ।
कालोसूचीमा परेका कम्पनीले उक्त अवधिभर सार्वजनिक निकायका कुनै पनि खरिद कारबाहीमा भाग लिन पाउने छैनन् ।
कार्यालयले ती कम्पनीलाई एकदेखि तीन वर्षसम्मका लागि कालोसूचीमा राखेको हो ।
