– हिरालाल आचार्य ‘Diamond’
चितवन, मंसिर २७ –
बिहे भोज खाएकाहरु सामुहिक बिरामी भएपछि चितवन गार्डेन रिसोर्टमा अनुगमन गर्दा उपभोग्य मिति समाप्त भएका अखाद्य बस्तु भेटिएका छन् ।
अनुगमनका क्रममा उपभोग्य मिति समाप्त भएका अखाद्य बस्तु भेटिएको खाद्य प्रविधि तथा गुण नियन्त्रण डिभिजन कार्यालय चितवनका प्रमुख एवम् खाद्य विज्ञ घननाथ अधिकारीले जानकारी दिए ।
अधिकारीका अनुसार होटलको भान्छालाई प्रदुषणमुक्त बनाउनका लागि स्वचालित ढोका नराखिएको, मासु जन्य पदार्थ राख्नका लागि डि फ्रिजको तामक्रम न्युनतम माइनस १८ डिग्री हुनुपर्नेमा माइनस ३ डिग्री मात्रै रहेको अनुगमनका क्रममा भेटिएको छ ।
तत्काललाई होटल भोजभतेर बन्द गराइएको र कारबाहीका लागि अनुसन्धान प्रक्रिया अघि बढाइएको उनले चितवन आजलाई जानकारी दिए ।
अनुगमनमा खाद्य विज्ञ अधिकारीसहित सहायक प्रमुख जिल्ला अधिकारी चिरञ्जिवी शर्मा, स्वास्थ्य कार्यालय चितवनका प्रतिनिधि र भरतपुर महानगरपालिकाका प्रतिनिधिहरुको उपस्थिति रहेको थियो । अनुगमन टोलीले प्रतिवेदन तयार पारेर प्रमुख जिल्ला अधिकारीलाई बुझाउने छ र थप प्रक्रिया अघि बढ्ने छ ।
उक्त चितवन गार्डेन रिर्साेटमा यही मंसिर २३ गते बिहे भोज खाएका २०० जना भन्दा बढी बिरामी भएका थिए । बिरामी भएपछि उनीहरु अस्पताल नै भर्ना हुनुपरेको थियो । केही अझै अस्पतालमा उपचाररत छन् ।
नवलपुरको गैंंडाकोट १ का गणेश ढकाल र भरतपुर १० की करिष्मा अधिकारीको बिहेमा संलग्न भएका ५२६ जनामा २०० भन्दा बढी बिरामी भएर अस्पताल पुगेका हुन् ।
भोज खाएकाहरुलाई काम ज्वरो आउने, पेट दुख्ने, पखाला लाग्ने समस्या भएपछि अस्पताल भर्र्ना भएका हुन् ।
दुलाहाका साथी गैंडाकाट १ का नविन ढकालले अघिल्लो दिन दिउँसो भोज खाएपछि भोलिपल्ट बिहानबाट जन्त गएकाहरु बिरामी हुन सुरु गरेको बताए । उनले गैंडाकोटबाट जन्ती गएका स्थानीयहरु सबै बिरामी भएको जानकारी दिए । भोज खाएकाहरु सबैजसो बिरामी रहेको र केहीले घरमै बसेर औषधी खाइरहेको उलने बताए ।
दुलाहाका साथी सविन लम्सालले होटलको लापरबाहीका कारण आफूहरु बिरामी हुनुपरेको बताए । उनले दुलाह दुलही पनि बिरामी भएको जानकारी दिए ।
खानामा अखाद्य वस्तु मिसिँदा भोज खाएकाहरुमा यस्तो समस्या आएको चिकित्सक तथा नर्सहरुले प्रतिक्रिया दिएका छन् ।
सम्बन्धित समाचर :
बिहे भोज खाँदा चितवनमा २०० जनाभन्दा बढी बिरामी, अस्पताल भर्ना (भिडियोसहित)
