चितवन, ४ मंसिर –
चितवनमा मतदानको निर्धारित समय सकिँदा करिब ७० प्रतिशत मत खसेको छ । निर्धारित समय साँझ ५ बजेसम्म करिब ७० प्रतिशत मत खसेको मुख्य निर्वाचन अधिकृत रितेन्द्र थापाले जानकारी दिए ।
‘मतदान स्थलमा मतदान सकिएर मतपेटिका मतगणना स्थलमा ल्याउने तयारी भइरहेको छ । केहि ठाउँमा फोन गरेर बुझ्दा खेरी अनुमानित ७० प्रतिशत जति मत खसेको पाइएको छ’, उनले भने ।
आज भएको प्रतिनिधि सभा तथा प्रदेश सभा सदस्यको निर्वाचनमा बिहान ७ बजेदेखि साँझ ५ बजेसम्म मतदान भएको थियो । ५ बजेभित्र मतदान स्थलभित्र प्रवेश गरिसकेका मतदाताले मतदान गरेका हुन् ।
चितवनमा चार लाख आठ हजार ३४२ जनाको नाम मतदाताको अन्तिम नामावलीमा रहेको छ । चितवन–१ मा एक लाख ३९ हजार ८४५, चितवन–२ मा एक लाख २४ हजार २१४ र चितवन–३ मा एक लाख ४४ हजार २८३ मतदाता छन् ।
