चितवन, कात्तिक ३०–
चितवन क्षेत्र नं २ बाट संघीय सांसदका लागि उमेदवारी दिएका राष्ट्रिय स्वतन्त्र पार्टीका सभापति रवि लामिछानेको उमेदवारी खारेजको माग गर्दै मंगलबार मुख्य निर्वाचन अधिकृतको कार्यालयमा उजुरी परेको छ ।
लामिछानेले नेपाली नागरिकता त्यागेर अमेरिकी नागरिकता लिएकोले उनले अहिले लिएको नेपाली नागरिकता बदर भइसकेको भन्दै उनको उमेदवारी खारेज हुनुपर्ने उजुरीमा माग गरिएको छ । उनीविरुद्ध परेको उजुरीको प्रक्रिया अब के हुन्छ ? भन्नेमा आम मानिसको चासो देखिन्छ । यस विषयमा हामीले मुख्य निर्वाचन अधिकृत रितेन्द्र थापासँग कुरा गरेका छौँ ।थापाका अनुसार मुख्य निर्वाचन अधिकृतको कार्यालयले आज उमेदवार लामिछानेलाई स्पष्टिकरण सोध्छ । कार्यालयले लामिछानेलाई सोध्ने स्पष्टिकरण तयार गरेर खामबन्दि पनि गरिसकेको छ । कार्यालय खुलेपछि उनलाई स्पष्टिकरणको पत्र थमाउने निर्वाचन अधिकृतको कार्यालयको तयारी छ ।उक्त स्पष्टिकरणको जवाफ दिन लामिछानेले ७ दिनको समय पाउँछन् । अबको पाँचौँ दिनमा निर्वाचन भइसक्ने भएकाले मतदान भएको दुई दिनपछिसम्म लामिछानेले जवाफ दिन पाउने छन् । लामिछानेलाई चुनाव प्रचार गर्न कुनै समस्या नहुने थापा बताउँछन् ।
‘आज हामीले उहाँलाई स्पष्टिकरण सोध्छौँ । उहाँले ७ दिनभित्रमा स्पष्टिकरणको जवाफ दिन सक्नुहुन्छ’, उनले भने, ‘जवाफ प्राप्त भएपछि हामीले उक्त जवाफ र उजुरीलाई निर्वाचन आयोगमा पठाउँछ । आयोगले नै त्यसको निर्णय गर्छ । उहाँलाई अहिले चुनाव प्रचारमा कुनै समस्या हुँदैन । गर्न पाउनुहुन्छ ।’
यदि उजुरी पुष्टि भएमा आयोगले लामिछानेको उमेदवारी बदर गर्छ । उजुरी पुष्टि हुन नसकेकामा निर्वाचनको मतपरिणाम जे आउँछ त्यहि कायम रहन्छ । आयोगले लामिछानेको उमेदवारी बदर गरिहाले पनि उनी सर्वाेच्च अदालत जान सक्छन् ।
