– विनय आचार्य
चितवन, ०७९ कात्तिक २७-
भरतपुरको सनराइज इङ्ग्लिस स्कुलले विषयगतरूपमा वृहत् प्रदर्शनी गरेको छ ।
शिक्षक, विद्यार्थी र अभिभावकको सक्रिय सहभागितामा विद्यालयमा अध्यापन हुने नेपाली, अङ्गे्रजी, गणित, विज्ञान, सामाजिक, कम्प्युटर विज्ञानका साथै होटल म्यानेजमेन्ट विषयका विद्यार्थीहरूले छुट्टाछुट्टै प्रदर्शनीको आयोजना गरेका हुन् ।
उक्त प्रदर्शनीमा विद्यार्थीहरूले विषयगतरूपमा आफ्नो पाठ्यक्रममा आधारित रहेर विभिन्न चित्रकला, मूर्तिकला तथा प्रयोगात्मक प्रदर्शनी गरेका छन् । विद्यार्थीहरूले प्रदर्शनीमा छौपडी प्रथादेखि लिएर विज्ञानले गरेको नयाँ आविष्कार सम्मका विषयवस्तु संलग्न गरेका थिए भने कक्षा ११ मा होटल व्यवस्थापन अध्ययनरत विद्यार्थीहरूले विभिन्न खाद्य परिकारहरू तयार गर्दै अभिभावकहरूलाई पस्किरहेका थिए ।
उक्त कार्यक्रममा अभिभावकहरूले यस किसिमको कार्यक्रमले विद्यार्थीहरूमा आफूले कक्षाकोठामा सिकेको शिक्षालाई प्रत्यक्ष रूपमा प्रयोगमा ल्याउँदा छुट्टै ज्ञानको विकास हुने र आउँदा दिनमा पनि यस किसिमको प्रदर्शनी निरन्तर हुन आवश्यक रहेको कुरा व्यक्त गरे । उक्त प्रदर्शनीलाई आगामी वर्षहरूमा उत्सवकै रूपमा सञ्चालन गर्ने र थप नविनतम प्रविधिको प्रयोग गर्दै उत्कृष्ट सिर्जनाहरू देखाउने विद्यालयले चितवन आज लाई जनाएको छ ।
