चितवन, कात्तिक ५-
प्रेस चौतारी चितवनले भवन निर्माण सहयोगार्थ आयोजना गरेको चौतारी साँझ २०७९ कार्यक्रममा भव्यताका साथ रुपमा सम्पन्न गरेको छ ।
शुक्रबार हिजो वीपी कोइराला मेमोरियल क्यान्सर अस्पतालको सभाहलमा चौतारी साँझ कार्यक्रम २०७९ कार्यक्रम सम्पन्न गरेको हो ।
चौतारी साँझमा स्थानीय र राष्ट्रिय कलाकारहरुको प्रस्तुतीमा दर्शकले भरपुर मनोरञ्जन लिए । जनवादी गायक जीवन शर्मा र गायक बद्री पंगेनीको गितमा दर्शकहरु मज्जाले नाचे ।
प्रेस चौतारी चितवनका अध्यक्ष सुवास पण्डितले कार्तिक ४ गते आज भरतपुरस्थित वीपी कोइराला मेमोरियल क्यान्सर अस्पतालको सभाहलमा चौतारीको भवन निर्माण सहयोगार्थ चौतारी साँझ कार्यक्रमको आयोजना गरिएको जानकारी दिए ।
कार्यक्रममा राष्ट्रिय कलाकारहरु जीवन शर्मा, बद्रि पंगेनी, एलिना चौहान, हास्य कलाकार राजा राजेन्द्र, कवि सुदेश सत्यालले आफ्नो प्रस्तुती दिए । साथै नारायणी कला मन्दिरको विषेश सांस्कृतिक प्रस्तुतीका साथैं, चितवनको पहिचान थारु नाच र देउसी भैलोको कार्यक्रम पनि गरिएको थियो ।
प्रभु हाउजिङ्ग तथा प्रोर्पटी डिर्लस प्रालि तथा व्यवसायी तेजबहादुर कार्की(केशव)ले प्रेस चौतारी चितवनलाई भवन निर्माणका लागि भन्दै भरतपुर ११ बसेनीमा पौने नौ धुर जग्गा उपलब्ध गराएका थिए ।
प्रेस चौतारीको आफ्नो नाममा जग्गा नेपालमा चितवन बाहेक कहि पनि नभएकोले आफ्नै स्वामित्वमा रहेको जग्गामा भवन बनाउन लागिएको प्रेस चौतारी चितवनका अध्यक्ष सुवास पण्डितले बताए ।
चौतारी साँझमा प्रवेशका लागि एक हजार, दुई हजार पाँच सय र पाँच हजारको टिकट राखिएको थियो । चौतारीको भवन साढे ३ तला बन्नेछ ।
चौतारी साँझको अवसरमा प्रेस चौतारी चितवनले नारायणी अनलाईनका सम्पादक कृष्ण आचार्य र प्राइम टाइम्स टेलिभिजनको चितवन संवाददाता रविना पौडेललाई पुरस्कृत गरेको छ । उनीहरुलाई जनही १० हजार रुपैयाँ राशीको जोखिम पत्रकारिता पुरस्कारबाट पुरस्कृत गरिएको पण्डितले बताए । उक्त पुरस्कारका लागि एनआरएनए जापानका राष्ट्रिय कमिटीका पूर्वसचिव, प्रवासी नेपाली मञ्च पूर्वी एशिया महादेशीय कमिटीका अध्यक्ष एवम् चितवन समाज जापानका पूर्व अध्यक्ष डा।सरोज कँडेलले पुरस्कारको संयोजन गरेका हुन् । गतवर्षबाट जोखिम पत्रकारिता पुरस्कार सुरु गरिएको थियो । गत वर्ष चितवन पोष्ट दैनिकका संवाददाता कुल काफ्ले र चितवन आज डटकमका समाचार प्रमुख हिरालाल आचार्य ‘डायमण्ड’ ले सो पुरस्कार प्राप्त गरेका थिए ।
११ हजार १११ राशीको स्वर्गीय पत्रकार द्वारिका नेपाल स्मृति पुरस्कारबाट सप्तगण्डकी बहुमुखी क्याम्पसका आमसञ्चारक तथा पत्रकारिता विषयका प्राध्यापक मधुसुदन दवाडी पुरस्कृत भएका छन् ।
चितवनमा पत्रकारिता विषय लिएर कक्षा १२ मा उत्कृष्ट अंक ल्याइ उत्तिर्ण भएका रौतहटका हैदल अली शाहलाई १० हजार रुपैयाँ राशीको शिक्षा पत्रकारिता पुरस्कारबाट पुरस्कृत गरिएको छ ।
साथै प्रेस चौतारी चितवनका संस्थापक रामबाबु सुवेदी, सञ्चारकर्मी मनोज पन्त, कोमलचन्द्र भगत, मनोज घिमिरे, सञ्चार उद्यमी सहन प्रधानलगायतलाई चौतारीले सम्मान गरेको छ ।
