माधव सापकोटा
चितवन, असोज २८-
श्री वैष्णव परिषद् नेपाल, श्री वैष्णव युवा परिषद् नेपाल र श्री वैष्णव महिला परिषद् नेपालको आयोजनामा नेपालमै प्रथम पटक हुन गइरहेको बृहद् आचार्य अभिनन्दन समारोह २०७९को तयारी कार्य पूरा भएको छ।
यही २०७९ असोज २९ देखि ३१ गतेसम्म श्रीमद्रामानुज वेद विद्याश्रम , गैंडाकोट,नवलपुरमा हुने उक्त कार्यक्रममा ६५ वर्ष माथिका नेपालका ५१ जना श्री वैष्णवाचार्यहरूलाई अभिनन्दन(सम्मान गरिने आयोजकहरूले जनाएका छन् ।
त्रिदण्डी पराङ्कुशाचार्य (शठकोप) जीयर स्वामीज्यूको प्रमुख आचार्यत्व, अयोध्याका जगद्गुरु वासुदेवाचार्य-विद्या-भाष्कर, स्वामीज्यूको प्रमुख आतिथ्य र श्री वैष्णव परिषद् नेपालका केन्द्रीय अध्यक्ष देवराजाचार्य स्वामीज्यूको अध्यक्षतामा सम्पन्न हुने सो कार्यक्रम मुक्तिनाथ पीठाधीश्वर स्वामी कमलनयनाचार्य , स्वामी जगन्नाथाचार्य , स्वामी कृष्णमाचार्य, स्वामी बालकृष्णाचार्यको पावन सान्निध्यमा हुने छ।
समारोहका कार्यक्रमअन्तर्गत भोलि असोज २९ गते निम्बार्क वैष्णव परिषद्का केन्द्रीय अध्यक्ष हरिशरण देवाचार्यको विशेष अभिनन्दन तथा २०७४ सालदेखि प्रतिवर्ष प्रदान गरिँदै आएको सर्वोत्कृष्ट श्री वैष्णव सेवा पुरस्कार एवम् सर्वोत्कृष्ट मातृसेवा पुरस्कार क्रमशः २०७६,२०७७ र २०७८ सालको पुरस्कार विभिन्न विशिष्ट व्यक्तिहरूलाई प्रदान गरिनेछ।
समारोहमा स्वामी गोपालाचार्य, स्वामी दामोदराचार्य र स्वामी घनश्यामाचार्यको विशेष सम्मान हुने समारोहका मीडिया संयोजक वेदप्रसाद आचार्यले बताए ।
समारोहका कार्यक्रमअन्तर्गत २०७९ असोज २९ गते प्रात:९ बजेदेखि रामानुजाचार्य-वैभव-विग्रह-सन्निधि देवघाटधामबाट रथयात्रा प्रारम्भ भई शेषलक्ष्मीनारायण मन्दिर क्षेत्रपुर हुँदै नारायणघाट बजार परिक्रमा गरी कार्यक्रमस्थल गैँडाकोटसम्म आइपुग्ने र सोही दिन ३ बजे समारोहको उद्घाटन हुने तथा असोज ३० र ३१ गते अभिनन्दन समारोह हुने कार्यक्रमका संयोजक तथा श्री वैष्णव युवा परिषद् नेपालका केन्द्रीय अध्यक्ष स्वामी लक्ष्मणाचार्यले जानकारी दिए ।
असोज ३० र ३१ गते बिहान ८ बजेदेखि १२ बजेसम्म र दिनको २ बजेदेखि बेलुका ५ बजेसम्म हुने दुवै सत्रमा विशिष्ट आचार्यहरूद्वारा श्री सम्प्रदाय रहस्य, विशिष्टाद्वैत वेदान्त तथा रामानुजाचार्य स्वामीजीका जीवन चरित्रका विषयमा प्रवचन तथा ख्यातिप्राप्त भजन-गायकद्वारा भक्तिसंगीत हुने आयोजकले जनाएका छन् ।
