चितवन, असार २२ –
राष्ट्रिय स्वतन्त्र पार्टी (रास्वप) ले २५ गते शनिवार चितवनमा जिल्ला भेला गर्ने भएको छ ।
चितवनको हाकिम चोकस्थित चितवन मिड टाउन (सिएमटी) रिसोर्टमा दिउँसो १२ बजे रास्वपाले जिल्ला भेला गर्न लागेको हो । रास्वपाका सभापति रवि लामिछानेले चितवनलाई आधार क्षेत्र बनाएर पहिलो जिल्ला भेला गर्न लागेको बताए ।
भेलाअघि भिडियो सन्देश जारी गर्दै सभापति लामिछानेले भने, ‘कठोर समयमा चितवन मलाई तकर्मका लागि बाटो देखायो । फलामे जन्जिर चिरेर बाहिरको संसारमा पखेटा फिँजाउन चितवनले सिकायो ।’ इमानको जग बलियो हुँदा जस्तोसुकै जंघार तर्न सकिन्छ भनि आत्मबोध पनि चितवनले गराएको उनको भनाइ छ । उनले भने, ‘त्यही चितवन हो मैले आफू हुनुको अर्थ थाहा पाएँ । जहाँ मैले आफूभित्रको संसार पनि थाहा पाएँ । म सम्झन्छु देशैभरिबाट चितवन आएको त्यो मानव सागर । आशा र भरोसाका एक–एक थोपा मिसिएर बनेको त्यो एक मानव सागर नै त थियो ।’
फेरि मानव सागरमा तैरिन चितवन आउन लागेको लामिछानेले बताए । ‘ जसले मलाई मान्छेबाट असफल मान्छेको बाटोमा डोर्याएको थियो । त्यही मानव सागरमा तैरिन म फेरि चितवन आउँदैछु हामी बनेर ।’ चितवनले आफूहरुलाई उड्न पखेटा दिने लामिछानेले विश्वास व्यक्त गरे । ‘रिक्ता र सुक्खा आँखामा मुल भर्ने हाम्रो यो महाअभियान चितवन कोशेढुंगा हुनेछ,’ उनी भन्छन्, ‘हामीसँग जोडिएर पार्टीको विभिन्न जिम्मेवारीमा रहेर काम गर्न चाहने धेरै हुनुहुन्छ । धेरैले पार्टी सदस्यता पनि लिसक्नुभएको छ ।’
चितवनको सिसा कम्पलेक्स, सहिद चोक, धौलागिरी फेन्सी स्टोर टाडी चोक, कँडेल चिया पसल देवघाट, पुरानो राजेश होटेल हाकिम चोकमा रास्वपाको पार्टी सदस्यता लिन सकिने लामिछाने बताए । उनले भने, ‘सदस्यता लिएर हाम्रो राष्ट्र निर्माणको अभियानमा जोडिएर सँगै हिड्न तयार रहन चितवनका सम्पूर्ण दाजुभाइ दिदीबहिनीलाई आग्रह गर्न चाहन्छु । अब हाम्रो भेट चितवनमा ।’
