– हिरालाल आचार्य ‘डायमण्ड’
चितवन, असार २० –
गिरिजाप्रसाद कोइरालाको ९९ औं जन्मजयन्ती चितवनमा विचार गोष्ठी गरेर मनाइएको छ । नेपाल तरुणदल साविक क्षेत्र नम्बर ४ को आयोजनामा भरतपुरको मंगलपुरमा आज बिहान गिरिजाबाबु र तरुणदल विषायक विचार गोष्ठी गरिएको हो ।
विचार गोष्ठीमा बोल्दै कार्यक्रमका प्रमुख अतिथि नेपाली कांग्रेस चितवनका पूर्वसभापति कृष्णलाल सापकोटाले गिरिजाप्रसाद कोइराला र आफूसँग जोडिएको ऐतिहासिक पलहरुका बारेमा सुनाए ।
नेपाली कांग्रेसले कम्युनिष्टसँग एकता गरे चितवन कांग्रेसले नमान्ने भनेर पार्टी सभापतिलाई आफूले पटकपटक भने पनि सभापतिले कुरा नसुन्दा भरतपुर महानगरको निर्वाचनमा भुईंकटरह चिन्ह लिएर आफूहरु चुनावमा गएको उनको भनाइ छ । विपिको विचार र सिद्धान्त, गिरिजाबाबुको सम्मानकै लागि आफूहरुले उम्मेद्वारी दिएको र आगामी चुनावमा पनि कम्युनिष्टलाई कांग्रेसले भोट हाल्नुपर्ने अवस्था आए आफूहरुले विद्रोह जारी राख्ने सापकोटाले बताए ।
कार्यक्रममा पूर्व सांसद एवम् भरतपुर महानगरपालिकामा भुईंकटहर चुनाव चिन्ह लिएर मेयरका उम्मेद्वार उठेका जग्गनाथ पौडेलले आफूहरुलाई कारबाही गरेको कुरा थाहा नभएको बताए ।
जसले कांग्रेसको विचारलाई बोक्छ, जसले कांग्रेसको आवाजलाई बुलन्द गर्छ त्यो नै सच्चा कांग्रेस हुने बताउँदै पौडेलले कारबाहीले कांग्रेस हुनलाई केही फरक नपर्ने बताए । उनले भने ‘कांग्रेस पार्टीमा हामीले रोपेका जरा त्यति कमजोर छैनन् जसले उखेलेर फालोस् । कांग्रेस कोहो भन्ने कुरा चितवनले आउँदो निर्वाचनमा देखाउँछ ।’ फेरि पनि आफूहरुको लडाइ सशक्त हुने र त्यो मेचि महाकालीसम्म जाने उनको भनाइ छ ।
पूर्व सांसद भीम बहादुर श्रेष्ठले कांग्रेसको नेतृत्वमा देशमा सबै परिवर्तन भए पनि अहिले कांग्रेस कम्युनिष्टको बैशाखि टेक्नुपर्ने अवस्थामा पुगेको बताए । वर्तमान कांग्रेस नेतृत्वले पार्टीलाई व्यक्तिगत स्वार्थका लागि कम्युनिष्टसँग एकता गराएको बताउँदै उनले यो कुराको समग्र कांग्रेसीले विरोध गर्नुपर्ने बताए ।
आफूहरुलाई पार्टीले कारबाही गरेको भनेको भए पनि आफूहरु अझै कांग्रेस भएको बताउँदै उनले विपिको मार्गमा कांग्रेसलाई हिँडाउन आफूहरुले सँधै यसरी नै आवाज उठाइरहने बताए । उनले अहिले को कता लाग्यो भनेर वडातहसम्म छानविन गरी कारबाही गर्ने रे भन्ने सुनिएको बताउँदै कारबाही गरे पनि पदमा नराखे पनि सधैं सच्चा कांग्रेस भएर हिँडिरहन उपस्थित मासलाई आग्रह गरे ।
नेपाल तरुणदल चितवनका संस्थापक अध्यक्ष शम्भु अर्यालले आफूहरुको भनाई भनेको सबै दल आआफ्नो तरिकाले चुनावमा प्रतिस्पर्धा गर्नुपर्छ भन्ने भएको बताए । ‘हाम्रो यो अभियान कुनै व्यक्तिका विरुद्धमा होइन विधि र पद्दतिका लागि हो’ उनले भने । स्वार्थका लागि पार्टी नेतृत्व कम्युनिष्टसँग मिलेको बताउँदै उनले यसले भविष्यमा कांग्रेसलाई निकै घाटा पु¥याउने धारणा राखे । मनपरि जसलाई पनि कारबाही गर्दे हिँड्ने नेतृत्वको प्रवृत्ति गलत भएको उनले बताए । उनले फेरि पनि कम्युनिष्टसँग एकता गरेमा चितवनमा आफूहरुले फेरि छुट्टै उम्मेद्वारी दिने बताए ।
यस कार्यक्रमलाई रोक्न भनेर ब्यानर नै तान्न आएको बताउँदै उनले यस्ता गतिविधिले आफूहरुको अभियान झन् सशक्त हुँदै जाने बताए । कार्यक्रमका विरोधमा एक युवकले ब्यानर तान्न आएका थिए । संस्थापन पक्षको आग्रहमा कार्यक्रम विथोल्न भनेर पठाइएको भन्दै कार्यक्रममा एकछिन् होहल्ला समेत भएको थियो ।
कार्यक्रममा नेपाली कांग्रेस जिल्ला कार्यसमिति चितवनकी सदस्य राममाया पियाले आफ्नो स्वार्थका लागि गिरिजाबाबुले कम्युनिष्टसँग कहिल्यै एकता नगरेको बताउँदै अहिले एकता हुनु गरिजाबाबुकै अपमान भएको बताइन् ।
कार्यक्रममा तरुणदलका पूर्व सचिव आनन्दाज राउतले कम्युनिष्टलाई बोक्न छाडन् र आफ्नो विचारमा अडिन कांग्रेस सभापति शेरबहादुर देउवासँग आग्रह गरे ।
कांग्रेस क्षेत्र नं. ३ की सचिव सृजना पाण्डेले पार्टीको क्रियाशिल सदस्य बाँड्दा पनि कम्युनिष्ट हुँ भनेर हिँडेकाहरुलाई बाँडिएको आरोप लगाइन् । केही कम्युनिष्टहरु कांग्रेसलाई भित्रभित्र सखाप पार्न पार्टीमा आएको बताउँदै उनले यसप्रति सजक हुनुपर्ने बताइन् ।
शिवहरी पण्डितले सञ्चालन गरेको कार्यक्रममा ट्रेड युनियनका सहसंयोजक सूर्य बस्नेत, कांग्रेस भरतपुर १५ का वडा उपसभापति कृष्ण बहादुर गुरुङ्ग, तरुण दलका संस्थापक जिल्ला सदस्य भुवन खनाल, पूर्व पार्टी जिल्ला सदस्य विष्णु थापा लगायतका कांग्रेस शुभेच्छुकहरुको उपस्थिति रहेको थियो ।
नेकपा माओवादी, नेकपा समाजवादी लगायतका कम्युनिष्ट पार्टीसँग मिलेर स्थानीय चुनावमा नेपाली कांग्रेसले गठबन्धन गरेपछि धेरै जिल्लामा कांग्रेसभित्रैबाट विरोध भइरहेको छ । आगामि चुनावमा कांग्रेसलाई एक्लै लड्न असन्तुष्ट समूहले पार्टी नेतृत्वलाई आग्रह गरिरहेको छ । यदि फेरि पनि कम्युनिष्टसँग मिलेर गएमा मेचिदेखि महाकालीसम्म कांग्रेसबाट बागी उम्मेद्वार दिने गरी उक्त असन्तुष्ट समूहले अभियान चलाइ रहेको छ । त्यही समूहको कार्यक्रम भएर होला आजको कार्यक्रममा कांग्रेसका वर्तमान जिल्ला नेतृत्वको उपस्थिति देखिदैनथ्यो ।
