बुटवल पुस १५
शीतलहरले बाटो चिप्लो भएपछि पूर्वपश्चिम राजमार्गको दाउन्नेमा १४ घण्टादेखि सडक अवरुद्ध भएको छ ।
दाउन्ने पहाडको उकालो र ओरालोमा शीतलहरले बाटो भिज्दा गाडी चिप्लिएर चल्न सकेका छैनन् ।
लामो जामले गर्दा सास्ती भोग्नु परेको यात्रुले गुनासो गरेका छन् । काठमाडौंबाट बुटवल आउँदै गरेका यात्रु विनोद परियारले आफू १४ घण्टादेखि दाउन्नेमा फसेको बताए ।
इलाका प्रहरी कार्यालय दुम्कीबासका प्रहरी नायव निरीक्षक ज्ञानप्रसाद काफ्लेले शीलतरहरले बाटो चिप्लिएपछि गाडीको ठूलो लाम लागेको बताए । ‘समस्या आइतबारदेखि नै थियो,’ काफ्लेले भने, ‘हिजो साँझदेखि ठप्प नै छ । बढी समस्या अहिले नवलपरासी पश्चिम खण्डमा छ । प्रहरीले खुलाउने प्रयास गरिरहेको छ । ’
निर्माणाधीन बुटवल नारायणगढ ११४ किलोमिटर सडकको अन्य ठाउँमा सहज भए पनि दाउन्नेमा अझै काम बाँकी छ । दाउन्नेमा वान वे बनाएर काम गर्दा ओभरलोड गाडी बिग्रिने समस्या भएको उनले बताए ।
