रत्ननगर ।
चितवनको पर्यटकीय नगरी सौराहामा आज शुक्रबारबाट सुरू हुने राष्ट्रिय स्वतन्त्र पार्टी (रास्वपा)को विस्तारित बैठकमा राजनीतिक प्रतिवेदनमाथि छलफल तथा चुनावी वाचापत्र परिमार्जन गर्ने तयारी गरिएको छ ।
दुई दिनसम्म चल्ने बैठकमा २०७९ सालमा निर्माण गरिएको वाचापत्र आगामी निर्वाचनलाई लक्षित गरी परिमार्जन गर्न लागिएको सो पार्टीका प्रवक्ता मनीष झाले बताए । राष्ट्रिय र स्थानीय मुद्दाहरुलाई समेटेर वाचापत्र परिमार्जन गर्ने तयारी गरिएको उनले बताए ।
‘अघिल्लो निर्वाचनलाई केन्द्रित गरी बनाइएको वाचापत्र अब सान्दर्भिक नहुन सक्छ’, प्रवक्ता झाले भने, ‘युवापुस्ता र जनचाहनाको विषयलाई समेत समेटेर वाचापत्र परिमार्जन गर्छौं ।’ बैठकमा जेनजी आन्दोलनपछिको राजनीतिक अवस्था, आगामी निर्वाचनका लागि उमेदवार छनोट विधि र चुनावी वाचापत्रको बारेमा छलफल हुने उनले जानकारी दिए ।
सौराहा सभाहलमा हुने बैठकको पार्टीका कार्यवाहक सभापति डोलप्रसाद अर्यालले गर्ने छन् । बैठकको सम्पूर्ण तयारी पूरा भएको र शुक्रबार बिहान ८ बजे उद्घाटन हुने बैठक व्यवस्थापन समितिका संयोजक तथा पार्टी सचिवालय सदस्य हरि ढकालले बताए ।
बैठकमा केन्द्रीय समिति, प्रदेश पदाधिकारी, केन्द्रीय विभागका पदाधिकारी, सल्लाहकार परिषद् र जिल्ला अध्यक्षहरु गरी ५१२ जना सहभागी हुने पूर्वसांसद्समेत रहेका ढकालले जानकारी दिए ।
बैठकमा चारवटा प्रस्तावमाथि छलफल हुने छ । कार्यवाहक सभापति अर्यालले राजनीतिक प्रतिवेदन, उपसभापति स्वर्णिम वाग्लेले वाचापत्रसम्बन्धी प्रतिवेदन, महामन्त्री कविन्द्र बुर्लाकोटीले सङ्गठन विस्तार र सङ्गठनको हालको संरचना तथा सहमहामन्त्री विपीन आचार्यले निर्वाचनका लागि उमेदवार छनोट प्रक्रियासम्बन्धी प्रतिवेदन पेस गर्ने र उक्त प्रतिवेदनमाथि अर्थपूर्ण छलफल हुने नेता ढकालले जानकारी दिए । रास्वपाको विस्तारित बैठकले सुस्ताएको सौराहाको पर्यटनलाई समेत चलायमान गराउने उनको भनाइ छ ।
‘मुलुकको तेस्रो पर्यटकीय नगरी सौराहा आन्दोलनको चपेटामा प¥यो’, नेता ढकालले भने, ‘सुस्ताएको सौराहाको पर्यटनलाई चलायमान गराउन पार्टीको विस्तारित बैठक सौराहामा राखेका हौँ ।’
