चितवन, असोज ८ –
नारायणगढ–मुग्लिन सडकखण्डमा अलपत्र परेका यात्रुलाई नेकपा (एमाले) चितवन स्वास्थ्य विभाग, राष्ट्रिय युवा संघ नेपाल जिल्ला कमिटी चितवन र नेपाल खेलकुद महासंघ जिल्ला कमिटी चितवनले औषधि र खानेकुरा वितरण गरेको छ ।
आज बिहानैबाट खानेकुरा र चिकित्सक नै लगेर औषधि वितरण गरिएको हो । करिब ९ सय जनालाई वितरण गरिएको राष्ट्रिय युवा संघ नेपाल चितवनका संयोजक सन्तोष श्रेष्ठ ‘मधुपर्क’ ले जानकारी दिए ।
यही असोज ५ गते पनि मुग्लिन पहिरोमा अलपत्र परेका यात्रुहरुलाई एमालेका युवाहरुले औषधि र खानेकुरा वितरण गरेका थिए । त्यतिखेर भने नेकपा (एमाले) चितवन स्वास्थ्य विभाग र राष्ट्रिय युवा संघ नेपाल भरतपुर महानगर कमिटीले औषधि र खानेकुरा वितरण गरेका थिए ।
नारायणगढ–मुग्लिन सडकखण्ड अन्तर्गत इच्छाकामना गाउँपालिका–६ तुइन खोलामा केही दिनदेखि पटकपटक पहिरो खस्दा यात्रुहरुले सास्ती खेपिरहनु परेको छ । सो ठाउँमा गत शुक्रबारदेखि निरन्तर पहिरो खसिरहेको छ । समय समयमा पहिरो पन्छाएर केही सवारी आवागमन गराइएको भए पनि हिजो मंगलबार दिउँसो ४ः३० बजे तुइन खोलामै ठूलो सुख्खा पहिरो खसेको थियो । उक्त पहिरो अझै पन्छाएर सकिएको छैन ।
ठूलो पहिरो खसेकाले पहिरो पन्छाउन अझै दुई दिन लाग्ने डिभिजन सडक कार्यालय भरतपुरले जनाएको छ । कार्यालयका अनुसार पहिरो पन्छाउन दुई वटा लोडर, एउटा स्काभेटर र एउटा भ्याकुलोडर परिचालन गरिएको छ । दमौलीबाट अर्काे एउटा स्काभेटर समेत ल्याइँदै छ ।
सडकको १६० मिटर भाग पहिरोले ढाकिएको छ । पहिरोका कारण ठूलो संख्यामा सवारीसाधन लाममा छन् । कतिपय यात्रुवाहक सवारी साधन भने फर्किएर वैकल्पिक मार्गतर्फ लागेका छन् ।
अलपत्र परेका यात्रुलाई विभिन्न सामाजिक संघ संस्थाले खानेकुरा सहयोग गरिरहेका छन् ।
