चितवन, असोज ३ –
आज असोज ३ अर्थात संविधान दिवस । २०७२ साल असोज ३ गते संविधान जारी भएको दिनलाई संविधान दिवसका रुपमा मनाइन्छ ।
संविधान दिवसको अवसरमा नेकपा (एमाले) जिल्ला कमिटी चितवनले संविधानको रक्षा र कार्यान्वयनको विषयमा अन्तरक्रिया कार्यक्रम सम्पन्न गरेको छ । एमाले चितवनको जिल्ला पार्टी कार्यालयमा आयोजित कार्यक्रममा वक्ताहरुले संविधान र पार्टीको विषयमा आआफ्नो धारणा राखे ।
कार्यक्रममा प्रमुख वक्ताका रुपमा रहेका संविधान सभा सदस्य एवम् नेकपा एमाले केन्द्रीय सदस्य कृष्णभक्त पोखरेलले संविधानमा भएका मुलभुत विशेषताका बारे प्रष्ट पारे ।
अहिलेको संविधान विश्वकै उत्कृष्ट मध्येको एक संविधान रहेको पोखरेलले बताए । संविधान गतिशिल दस्तावेज भएकाले राष्ट्रिय अखण्डता, सार्वभौम सत्ता लगायतका महत्वपूर्ण विषय बाहेक अन्य सबै कुरा संशोधन गर्न सकिने बताए । उनले सुशिला कार्की प्रधानमन्त्री नियुक्त हुन संविधानको कुनै पनि धाराले नमिल्ने प्रष्ट पारेका छन् । जेनजी भनेको हाम्रै छोराछोरीको उमेर समुह भएकाले उनीहरु प्रति नकरात्मक हुन आवश्यक नरहेको उनले बताए । जेनजीका नाममा षड्यन्त्रकारी तत्वले गरेको घुसपैठको अनुसन्धान भने हुनुपर्ने उनको भनाइ छ ।
एमाले केन्द्रीय सदस्य जेएन थपलियाले संविधानमा धेरै राम्रा कुराहरु लेखिएको बताए । उनले भने, ‘तर त्यहाँ लेखिएका कुरा कार्यान्वयन गर्न १० वर्ष काफी त हो । त्यहाँ लेखिएका कुरालाई व्यवहारमा ल्याउनु पथ्र्याे त्यो किन गरेनौ त सत्तामा हुँदा भन्ने प्रश्न त उठ्छ । एउटै पार्टीको सरकार हामी कहिल्यै हुन सकेनौं । त्यसले गर्दा चारैतर्फबाट घेराबन्दी भइरह्यो । त्यसैले समयमा संविधानलाई कार्यान्वयन गर्न नसकिएको हो र यसले संकट उत्पन्न गराएको छ ।’
उनले यस संकटलाई अवसरका रुपमा लिएर पार्टीबाट भएका कमी कमजोरीलाई सुधारेर एमाले अब अघि बढ्ने बताए ।
पार्टी नेतृत्वको विषयमा बोल्दै नेता थपलियाले अहिले नेतृत्व परिवर्तनको कुरा उठाउने समय नभएको बताए । उनले जेनजीको आन्दोलनमा एमाले र केपी ओली विरोधी देशि विदेशी शक्तिहरुले षड्यन्त्र गरी घुसपैठ गरेको बताए । ‘यो एउटा आन्दोलन मात्र होइन, उनले भने, ‘यो नेपालको कम्युनिष्ट शक्ति माथिको आक्रमण हो, नेता र सत्ता माथिको मात्र होइन ।’ उनले एमालेको नेतृत्व परिवर्तनको कुरा महाधिवेशनमा नै हुने प्रष्ट पारेका छन् । उनले जनतालाई देशी विदेशी शक्तिले गरेको षड्यन्त्रका बारेमा बुझाउन आवश्यक रहेको बताएका छन् ।
एमाले चितवनका निवर्तमान अध्यक्ष एवम् बागमती प्रदेश कमिटी सदस्य राम प्रसाद न्यौपानेले एमाले शत्तामा हुँदा भ्रष्टाचार अन्त्य र सुशासनका लागि कति प्रयत्न गरियो भनेर जनतालाई बुझाउन नसक्दा पनि आजको अवस्था आएको बताए । जेनजीले उठाएका एजेण्डाहरु एमालेले बोक्दै आएको एजेण्डा नै भएकाले जेनजीको आन्दोलनलाई स्वीकार गर्दै पार्टीलाई नयाँ शिराबाट अगाडि बढाउनु धारणा न्यौपानेले राखे । उनले कार्यकर्ताको कुरा नै सुन्न नचाहने, आफ्ना अनुकुलका मात्र निर्णय गर्ने नेतृत्वको प्रवृत्तिले पनि यो संकट पैदा भएको बताए । संविधानसँगै नेकपा एमाले पनि गम्भीर संकटको अवस्थामा रहेको बताउँदै न्यौपानेले अब नेतृत्वले सच्चिएर पार्टीलाई नयाँ ढंगबाट अगाडि बढाउन आवश्यक रहेको बताए । उनले जेनजी आन्दोलनमा रास्वपा, राप्रपाको नाममा राजावादी र माओवादीको केही अराजक तत्वले आन्दोलनमा घुसपैठ गरी आन्दोलानलाई भड्काउने काम गरेको बताए ।
नेकपा एमाले चितवनका अध्यक्ष कमल राज पाठकले आन्दोलनमा रास्वपा, राजावादी र केही दलका असन्तुष्ट समूहले जेनजी आन्दोलनमा घुसपैठ गरेको बताए । उनले केपी शर्मा ओली चीनमा गएर लिपुलेक, कालापानी र लिम्पियाधुरा हाम्रो भूमि हो भनेपछि भारत विच्किएर यो षड्यन्त्र रचेको बताए । राष्ट्रियताको पक्षमा दरो उभिएकै कारण राष्ट्रियता विरोधी शक्ति र विदेशी शक्तिहरुको चलखेलमा षड्यन्त्र गरेर जेनजीको ब्यानरमा विध्वंशकारी आन्दोलन रचिएको अध्यक्ष पाठकले बताए । उनले संविधान र राष्ट्रियताको रक्षा गर्ने सामथ्र्य राख्ने एकमात्र पार्टी नेकपा एमाले भएकाले कत्ति पनि विचलित नभई एकजुट भएर पार्टीको काममा लाग्नुपर्ने बताए ।
अन्तरक्रिया कार्यक्रम समापन पश्चात चितवनका सात वटै पालिका पार्टी कमिटीले आफ्नो पायक पर्ने ठाउँमा कार्यक्रमसहित दीप प्रज्वलन गरेर संविधान दिवस मनाएका छन् ।
