चितवन भदौ २
चितवनका एक जना प्रतिष्ठित व्यवसायी तथा समाजसेवी शंकरप्रसाद घिमिरे राष्ट्रिय स्वतन्त्र पार्टी (रास्वपा)मा औपचारिक रूपमा प्रवेश गरेका छन्। गैँडाकोट नगरपालिका–२, श्रीनगर टोल निवासी घिमिरेले केही दिनअघि पार्टीको औपचारिक सदस्यता लिएको भए पनि आज गैँडाकोटमा आयोजित विशेष कार्यक्रममा सार्वजनिक रूपमा रास्वपामा प्रवेशको घोषणा गरेका हुन्।
लामो समयदेखि नेपाली कांग्रेसको पृष्ठभूमिमा सक्रिय रहँदै आएका घिमिरे व्यवसायिक तथा सामाजिक क्षेत्रका एक परिचित अनुहार हुन्। चितवनको पुलचोकमा सञ्चालित डायमन्ड फेन्सी र होटल डायमन्डका सञ्चालक उनी, ग्यालेक्सी गार्डेन रिसोर्टका सेयर सदस्य समेत हुन्।
व्यवसायिक गतिविधिसँगै घिमिरे विभिन्न सामाजिक तथा संस्थागत नेतृत्वमा समेत सक्रिय रहँदै आएका छन्। उनी उवासंघ चितवनको कार्यसमिति सदस्य, फेन्सी व्यवसायी संघ चितवनका निर्वतमान अध्यक्ष, गणेश बजार व्यवस्थापन समितिका पूर्व उपाध्यक्ष, कमलनगर बजार व्यवस्थापन समितिका संस्थापक अध्यक्ष, तथा रोटरी क्लब अफ गैँडाकोटका पूर्व अध्यक्ष समेत भइसकेका छन्।
पार्टी प्रवेशपछि घिमिरेले भने “पुराना दलहरूले मुलुकमा उल्लेखनीय परिवर्तन ल्याउन सकेनन्। अब म रास्वपामार्फत जनताको सेवामा समर्पित हुने निर्णयमा पुगेको छु।”उनको पार्टी प्रवेशसँगै स्थानीय राजनीतिक समीकरणमा नयाँ बहस सुरु भएको छ।घिमिरेको प्रवेशले रास्वपाको सांगठानिक सशक्तिकरणमा थप ऊर्जा थपिएको छ भने स्थानीय स्तरमा पार्टीको प्रभाव झनै फैलिएको छ।
