गैंडाकोट असार ७
गैंडाकोट नगरपालिकाले आगामी आर्थिक वर्ष २०८२/८३ का लागि १ अर्ब ८ करोड ७२ लाख रुपैयाँभन्दा बढीको बजेट सार्वजनिक गरेको छ। नगर उपप्रमुख शान्ति कोइरालाले नगरसभामा बजेट प्रस्तुत गर्दै सुशासन, सेवा प्रवाहको छरितोपन, कृषि, पर्यटन, रोजगार र समावेशी समाज निर्माणलाई बजेटको केन्द्रमा राखिएको जानकारी दिनुभयो।
नगरपालिकाले सेवा छिटो, सहज र प्रविधिमैत्री बनाउने उद्देश्यसहित बजेट निर्माण गरेको जनाएको छ। यसपटकको बजेटमा नागरिकका लागि सहज पहुँच हुने स्वास्थ्य र गुणस्तरीय शिक्षा, विपद् व्यवस्थापन, गरिबी न्युनीकरण र रोजगारी सृजनामा विशेष प्राथमिकता दिइएको छ।
नगरपालिकाले समावेशी र समतामूलक समाज निर्माणमा विशेष जोड दिइएको छ, लक्षित वर्गलाई श्रोत-साधन र अवसरमा समान पहुँच सुनिश्चित गरिने जनाएकाे छ।नगरको विकासका लागि विनियोजन गरिएको बजेटमा चालु खर्चतर्फ ६३ करोड ३१ लाख र पुँजीगत खर्चतर्फ ४५ करोड ४० लाख छुट्याइएको छ।
नगरपालिकाले सार्वजनिक गरेको आर्थिक वर्ष २०८२/८३ को बजेटले समावेशी, पारदर्शी र दिगो विकासलाई लक्ष्य बनाएर विविध सामाजिक र आर्थिक क्षेत्रलाई प्राथमिकतामा राखेको छ। सेवा प्रवाहदेखि रोजगारी सिर्जनासम्म र सामाजिक सुरक्षादेखि पूर्वाधार निर्माणसम्मका विषयलाई समेट्दै नगरले नागरिकमैत्री दृष्टिकोण अघि सारेको छ।
बजेटको मूल उद्देश्य सेवा छरितो, पारदर्शी र प्रविधिमैत्री बनाउने हो। प्रत्येक नागरिकको आधारभूत स्वास्थ्य सेवा र गुणस्तरीय शिक्षामा सहज पहुँच सुनिश्चित गर्ने उद्देश्यसहित बजेट तयार गरिएको छ। त्यसैगरी, कृषिमा आत्मनिर्भरता र रोजगारी सिर्जना गर्दै गरिबी न्युनीकरणको दिशामा ठोस पाइला चालिएको छ।
पर्यटन प्रवर्द्धन, विपद् व्यवस्थापन र सामाजिक सुरक्षालाई समेत समेटिएको बजेटले लक्षित वर्गहरू—जस्तै अपाङ्गता भएका व्यक्ति, महिला, वृद्धवृद्धा र विपन्न समुदाय—लाई केन्द्रमा राखेको छ।
नगरपालिकाले साना तथा घरेलु व्यवसाय सञ्चालन गर्ने अपाङ्गता भएका नागरिकहरूलाई कर छुटको व्यवस्था निरन्तरता दिएको छ। ‘क’ र ‘ख’ वर्गका अपाङ्ग व्यक्तिहरूका व्यवसायमा क्रमशः ८०% र ७०% छुट यथावत् राखिँदा, ‘ग’ वर्गका अपाङ्ग व्यक्तिहरूका व्यवसायमा पहिलोपटक ५०% छुट दिने व्यवस्था गरिएको छ।
नगरपालिकाका प्रमुख प्रशासकीय अधिकृत झविन्द्र खनालले चालु आर्थिक वर्षमा अघिल्लो आर्थिक वर्षको तुलनामा ४.५ प्रतिशत प्रशासनिक खर्च घटाइएको जानकारी दिए । खनालले नगरपालिकाले सुशासन, सेवा प्रवाहको छरितोपन, कृषि, पर्यटन, रोजगार र समावेशी समाज निर्माणलाई केन्द्रमा राखेर काम गरेको बताए ।
बजेटका प्राथमिकता क्षेत्रहरू यस्ता छन्:
गुणस्तरीय शिक्षा र स्वास्थ्यमा सहज पहुँच: हरेक बालबालिकाले गुणस्तरीय शिक्षा प्राप्त गरून् र हरेक नागरिक आधारभूत स्वास्थ्य सेवाबाट बञ्चित नहोस् भन्ने लक्ष्य।
प्रविधिमैत्री र पारदर्शी सेवा प्रवाह: सुशासनको प्रत्याभूति गर्दै प्रविधिको अधिकतम प्रयोगमार्फत नागरिक सेवा छरितो र सरल बनाउने योजना।
सामाजिक विकास र सुरक्षा: लक्षित वर्गको सशक्तिकरण, सामाजिक न्यायको प्रवर्द्धन र सहजीकरणको लागि विविध कार्यक्रम।
कृषिको व्यवसायीकरण र बजारीकरण: परम्परागत कृषिलाई आधुनिक विधिबाट उत्पादनमुखी बनाउने, युवालाई कृषि रोजगारीतर्फ आकर्षित गर्ने।
भौतिक पूर्वाधार विकास: बाटो, पुल, खानेपानी, सरसफाइलगायत नगरको आधारभूत संरचना मजबुत बनाउने।
विपद् व्यवस्थापन: विपद् पूर्वतयारीदेखि पुनःस्थापनासम्मको चक्र व्यवस्थित बनाउँदै सुरक्षित नगर बनाउने।
पर्यटन प्रवर्द्धन: गैंडाकोटका सम्भावनाशील पर्यटकीय स्थलहरूको संरक्षण, विकास र प्रचार-प्रसार गर्दै स्थानीय अर्थतन्त्र सुदृढ बनाउने।
रोजगारी सिर्जना र गरिबी न्युनीकरण: साना उद्यम, सीप विकास, सहुलियत कर नीतिजस्ता कार्यक्रममार्फत रोजगारका अवसर विस्तार गर्ने।
राजस्व परिचालनमा सुधार: आन्तरिक राजस्व संकलन प्रणाली पारदर्शी बनाउँदै आर्थिक आत्मनिर्भरता हासिल गर्ने।
