भरतपुर,असार ४-
चितवनको भरतपुर महानगरपालिकाले पोखरी मर्मत सुधारका लागि विनियोजन गरेको बजेट सुवेदी कल्याण प्रतिष्ठान नेपाललाई दिएको छ । महानगरपालिका भित्रका पोखरी मर्मम सुधारका शिर्षक तथा कार्यक्रमबाट महानगरपालिका वडा नम्वर १ मा रहेको सुकल्प भवन निर्माणका लागि सुवेदी प्रतिष्ठानलाई रकम भुक्तानी गरिएको हो । महालेखा परीक्षकको प्रतिवेदन अनुसार आर्थिक वर्ष २०८०÷०८१ मा फरक शिर्षकबाट सो भवन निर्माणका लागि १६ लाख ९९ हजार रुपैयाँ भुक्तानी गरेको पाइएको छ । भवन निर्माणका लागि १९ लाख ६३ हजार ६ सय ७० रुपैयाँ उपभोक्ता समिति मार्फत सम्झौता गरिएको थियो । पछि यसको मुल्यांकन गरी १६ लाख ९९ हजार रुपैयाँ भुक्तानी गरिएको थियो ।
सरकारी कोषको रकम सार्वजनिक हक हितका लागि प्रयोग गर्नुपर्नेमा अनुत्पादक योजना छनोट गरी खर्च गरेकोमा महालेखाले महानगरपालिकालाई प्रश्न समेत गरेको छ । यस्तो खालको लगानी नीजि जग्गामा निर्माणधिन धार्मिक प्रतिष्ठान निर्माण तथा मर्मतमा खर्च गरिएकोमा महालेखाले बेरुजु औल्याएको हो । सार्वजनिक हितको प्रयोजनार्थका लागि छुट्टिएको रकम प्रतिष्ठानका लागि खर्च गरिनु उपयुक्त नहुने महालेखाको ठहर छ । महानगरले योजना, बजेट रकमान्तरण गर्दा पूर्वाधार निर्माण हुने जग्गाको स्वामित्व,सम्भाव्यता अध्ययन जस्ता नितिगत प्राविधिक पक्ष समेत विचार गरी पूर्ण सार्वजनिक क्षेत्रमा मात्र पुँजिगत लगानी गर्न महालेखाले सुझाब दिएको छ ।
