काठमाडौँ, माघ ४ –
६ महिनाको अवधिमा १ लाख १० हजार ३४५ जनाले चितवन राष्ट्रिय निकुञ्जको भ्रमण गरेका छन् । चालु आर्थिक वर्षको साउनदेखि पुस मसान्तसम्मको अवधिमा नेपाली ५३ हजार १०३ जना, सार्क मुलुकका १० हजार ८५० जना र अन्य विदेशी ४६ हजार ३९२ जना गरी जम्मा १ लाख १० हजार ३४५ जना पर्यटकले राष्ट्रिय निकुञ्जको भ्रमण गरेका हुन् ।
यसबाट १३ करोड एक लाख छयालीस हजार चार सय पचास रुपैयाँ आम्दानी भएको चितवन राष्ट्रिय निकुञ्ज कार्यालयले जारी गरेको विज्ञप्तिमा उल्लेख छ ।
यस अवधिमा यस राष्ट्रिय निकुञ्जको मध्यवर्ती क्षेत्रमा गैँडाको आक्रमणमा परी दुई जना घाइते भएका छन् भने एक जनाको मृत्यु भएको सूचना अधिकारी अविनाश थापा मगरले जानकारी दिए ।
यस्तै पौष १ गतेदेखि २९ गतेसम्म बिना अनुमति राष्ट्रिय निकुञ्ज प्रवेश गरी घाँस दाउरा काट्ने १४ जना, माछा मार्ने ३ जना, गैडासँग सम्बन्धित कसुर गर्ने १ जना गरी जम्मा १८ जना मानिसहरूलाई नियन्त्रणमा लिई नियमानुसार कारबाही गरिएको पनि निकुञ्जले जनाएको छ । यसै अवधिमा राष्ट्रिय निकुञ्ज तथा मध्यवर्ती क्षेत्रभित्र पर्ने विभिन्न स्थानहरूबाट अजिङ्गर ४ वटा, भाले गैँडा १ वटा, भाले कालो स्टर्क १ वटा गरी जम्मा ६ वटा वन्यजन्तुहरूको उद्धार तथा पुनर्स्थापना गरिएको छ ।
