चितवन, पुष २३ –
नेपाल राष्ट्रिय भूपू सैनिक तथा प्रहरी संगठन चितवनको अध्यक्षमा पुनः दधिराम देवकोटा चयन भएका छन् ।
आज नेकपा (एमाले) चितवनको पार्टी कार्यालयको सभाहलमा सम्पन्न संगठनको ३४ औं स्थापना दिवस तथा छैठौं अधिवेशनले सर्वसम्मतबाट देवकोटाको नेतृत्वमा २५ सदस्यीय जिल्ला कार्य समिति चयन गरेको हो । देवकोटा अध्यक्षमा पुनः दोहोरिएका हुन् ।
निर्वाचन समिति अध्यक्ष एवम् एमाले चितवनका सचिवालय सदस्य कृष्ण केसीका अनुसार समितिको उपाध्यक्षहरुमा भेषनाथ चौलागाईं, राजेन्द्र प्रसाद वाग्ले, सचिवमा टुलक दत्त पौडेल, उप सचिवहरुमा रमादेवि भट्ट, शुक्र बहादुर श्रेष्ठ र कोषध्यक्षमा चन्द्र प्रकाश पौडेल चयन भएका छन् । नेपाल राष्ट्रिय भूपू सैनिक तथा प्रहरी संगठन एमाले निकट संगठन हो ।
स्थापना दिवसका अवसरमा संगठनमा रहेर विशिष्ट योगदान पुराउने १२ जना भूपू सैनिक र सैनिकका परिवारलाई सम्मान गरिएको छ ।
स्थापना दिवस तथा अधिवेशनको खुला सत्रमा एमाले चितवनका अध्यक्ष कमल राज पाठक, निवर्तमान अध्यक्ष एवम् प्रदेश कमिटी सदस्य रामप्रसाद न्यौपाने, पूर्व बागमती प्रदेश सभासद कृष्ण भुर्तेल लगायतको उपस्थिति रहेको थियो ।
