काठमाडाैं, भदौ २२
वासिङ्सन– अमेरिकाको मिसौरी राज्यका बर्डफ्लूबाट सङ्क्रमित जनावरको सम्पर्कमा नआइकन एक व्यक्तिमा यसको सङ्क्रमण देखिएको छ ।
रोग नियन्त्रण तथा रोकथाम केन्द्रअन्तर्गतको मिसौरी ‘डिपार्टमेन्ट अफ हेल्थ एन्ड सिनियर सर्भिसेज’का अनुसार ती वयस्क बिरामीलाई अगस्ट २२ मा अस्पताल भर्ना गरिएको थियो । बिरामीलाई इन्फ्लुएन्जाविरुद्ध एन्टिभाइरल औषधि दिएपछि निको भएको र अस्पतालबाट डिस्चार्ज गरि सकिएको जनाइएको छ ।
प्रारम्भिक परीक्षणमा बिरामीको फ्लूको प्रकार शङ्कास्पद देखिएकाले यसलाई राज्य र सङ्घीय प्रयोगशालामा थप परीक्षणका लागि पठाइएको थियो । परीक्षणबाट ती बिरामीलाई यो एच–५ (बर्डफ्लू) भएको पुष्टि भएको छ ।
यो वर्ष अमेरिकामा बर्डफ्लूको सङ्क्रमण पुष्टि हुने उनी १४ औं व्यक्ति थिए । यस्तै जनावरहरूसँगको सम्पर्कबिना बर्डफ्लू पुष्टि हुने उनी पहिलो व्यक्ति हुन् ।
‘मिसौरीमा दूधका लागि पालिएका गाईहरूमा एच ५ सङ्क्रमण रिपोर्ट गरिएको छैन,’ त्यहाँको स्वास्थ्य विभागले भनेको छ, ‘यद्यपि ‘व्यावसायिक वा घरको आँगनमा पालिने केही पङ्क्षीहरूको समूह वा जङ्गली चरा’हरूमा बर्डफ्लू सङ्क्रमण भएको भने पुष्टि भएको छ ।’
सन् २०२२ मा बर्डफ्लूका सबै घटना फार्मवर्कर्समा थिए, जसमा पहिलोपटक देखिएका घटना धेरै थिए ।
बर्डफ्लू सबैभन्दा बढी जङ्गली चराचुरुङ्गी र कुखुरामा पाइन्छ, तर पछिल्लो समय स्तनधारी जनावरमा पनि देखिएको छ । यस वर्ष अमेरिकाभर बर्डफ्लूको प्रकोप गाईवस्तुमा पनि देखिएको छ।
