पेरिस, भदौ ९-
मेसेजिङ एप टेलिग्रामका प्रमुख कार्यकारी अधिकृत (सीईओ) पावेल दुरोभलाई फ्रान्सेली प्रहरीले पक्राउ गरेका छन् । फ्रान्सेली सञ्चारमाध्यमका अनुसार पावेल दुरोभ आफ्नो निजी जेटमा पेरिसको ले बोर्गे एयरपोर्ट पुगेका थिए । त्यहीबाट प्रहरीले उनलाई पक्राउ गरेको हो ।
फ्रान्सेली प्रहरी अधिकारीहरुका अनुसार ३९ वर्षीय दुरोभलाई म्यासेजिङ एपसँग सम्बन्धित अपराधमा जारी भएको पक्राउ पुर्जीका आधारमा समातिएको हो ।
फ्रान्समा रहेको रुसी दूतावासले स्थिति सम्हाल्न तत्काल कदम चालिरहेको बताएको छ । टेलिग्राम एप रुस, युक्रेन र यस क्षेत्रका अन्य देशमा निकै लोकप्रिय रहँदै आएको छ । प्रयोगकर्ताको डाटा हस्तान्तरण गर्न अस्वीकार गरेपछि रुसले सन २०१८ मा यो एपमाथि प्रतिबन्ध लगाएको थियो । तर सन्२०२१ मा सो प्रतिबन्ध हटाइएको थियो ।
टेलिग्राम फेसबुक, युट्युब, ह्वाट्सएप, इन्ष्टाग्राम, टिकटक र विच्याटपछि विश्वको सबैभन्दा लोकप्रिय सामाजिक सञ्जाल मञ्चमा पर्दछ । दुरोभले सन् २०१३ मा टेलिग्रामको स्थापना गरेका थिए । एजेन्सी
