रसुवा १३ जेठ-
रसुवामा चोरीका घटना बढेको छ । जिल्लाको दक्षिणी भेगमा पछिल्लो एक सातादेखि चोरीका घटना बढेको हो । पछिल्लो एक सातामा व्यक्तिका घर, सहकारी तथा सरकारी भवनमा चोरीका घटना घटेको जिल्ला प्रहरी कार्यालय रसुवाका प्रहरी नायब उपरिक्षक कुलदिप चन्दले बताए ।
बिहीबार राति मात्रै उत्तरगया गाउँपालिका ५ मा रहेको दुई वटा सहकारीको कार्यालयमा चोरी भएको छ । जनजागरण बचत तथा ऋण सहकारी संस्था र कालिका बहुउदेश्यीय सहकारी संस्थामा चोरी भएको हो ।
कालिका बहुउदेश्यीय सहकारी संस्थाको ढोकाको ताल्चा फोरि नगद ७३ हजार ४ सय ४५ रुपैया चोरी भएको प्रहरीले जनाएको छ ।
त्यसैगरि, उत्तरगया गाउँपालिका ४ कर्मिडाँडा स्थित लहरेपौवा स्वास्थ्य चौकी भवनमा समेत तोडफोड भएको छ । स्वास्थ्य चौकीमा रहेको १ सय ५० रुपैया समेत चोरी भएको छ । केही स्थानियको घरमा पनि एकैपटक चोरी भएको छ । बिहीबार चोरी गर्ने व्यक्तिले जनजागरण वचत तथा ऋण सहकारी संस्थाको कार्यालय तोडफोडसमेत गरेको पाइएको छ । कार्यालय तोडफोड गरे पनि संस्थाबाट चोरले नगद भने नलिएको बताइएको छ ।
यस्तै अघिल्लो साता (गएको ६ गते) पनि कालिका गाउँपालिका र उत्तरगया गाउँपालिकामा स्थित सरकारी कार्यालय, व्यक्तिका घर, पसलमा चोरीका घटना भएको छ । कालिका गाउँपालिकाको कालिकास्थान धारापानी एवं बेतिनी तथा उत्तरगया गाउँपालिका ५ को माझगाउँ र बनुवा घुम्तीमा चोरीको घटना भएको थियो । कालिका गाउँपालिकामा विभिन्न स्थानमा सातवटा निजी घर तथा बेतिनीमा रहेको सामुदायिक स्वास्थ्य एकाइ साथै सहकारी संस्था र उत्तरगया गाउँपालिका ५ वडा कार्यालय निजी घरसमेत तोडफोड भएको भन्दै प्रहरीमा उजुरी परेको छ । विभिन्न कार्यालय तथा घर गरि १४स्थानमा चोरीका घटना घटेको प्रहरीले जनाएको छ । करिब चार लाख नगद तथा करिब चार तोला सुन चोरी भएको जनाइएको छ ।
त्यस्तै डेढ महिनाअघि पनि उत्तरगया गाउँपालिका २ डाँडागाउँ क्षेत्रमा दर्जनौं घरमा चोरी भएको थियो ।
घटनाको विवरण अनुसार मानिस नभएका व्यक्तिका घर, पसल, सरकारी भवन (वडा कार्यालय, स्वास्थ्य चौकी, बिद्यालय) सहकारीमा चोरी तथा तोडफोड भएको पाइएको प्रहरी नायब उपरिक्षक चन्दले बताए ।
चोरीमा संलग्न व्यक्तिको पहिचान गर्न आवश्यक अनुसन्धानको प्रक्रिया अघि बढाइएको समेत उनले बताए । ‘पछिल्लो समय चोरीको घटना बढ्दै गएकोले गम्भिर रुपमा लिई अनुसन्धानका प्रक्रियाहरु हामीले अघि बढाएका छौँ, घटनाको प्रकृति हेर्दा मानिस नभएको घर तथा भवनमा चोरी तथा तोडफोड भएको पाइएको छ, उनले भने, ।
जिल्लामा चोरीका घटना बढ्न थालेसँगै अनुसन्धानका लागि जिल्ला प्रहरी कार्यालय रसुवाका प्रहरी निरिक्षक झलक शर्माको नेतृत्वमा ५ सदस्यीय टोली परिचालन गरिएको छ । चोरीमा संलग्नहरुको पहिचानका लागि अनुसन्धान सुरु गरिरहेको प्रहरी निरिक्षक शर्माले बताए । चोरले मानविय क्षति गरेको छैन्, तर मानिस नभएका घरहरुमा तोडफोड र चोरीका घटना भएको छ, उनले भने, हामीले अनुसन्धानका सबै कामहरु गरिरहेका छौँ, ।
दर्जनौं घर, सहकारी तथा सरकारी भवनबाट चोरी भए पनि हालसम्म चोरीमा संलग्न व्यक्ति वा समूह पक्राउ परेका छैनन् । भने तोडफोड तथा चोरीका घटना बढेसँगै जनमानसमा त्रास फैलिएको छ । उत्तरगया गाउँपालिकाका उज्वल आचार्यले चोरीका घटना बढ्नथालेसँगै नागरिकहरुमा त्रास फैलिएको बताए । सुरक्षा सक्रियता बढाउनुपर्नेमा सुरक्षा संबेदनशिलता कस्तो रहेछ भनी नागरिकमा निराशा पैदा भएको समेत उनले बताए ।-न्युज कारखाना
