चितवन, २५ जेठ
मकवानपुरबाट चितवन आउँदै गरेको मोटरसाइकललाई ग्यास बुलेटले ठक्कर दिदाँ एकजनाको मृत्यु भएको छ । मृत्यु हुनेमा मोटरसाइकल पछाडी सवार ३३ वर्षीया निर्मला अधिकारी रहेकी छन् ।
मनहरी गाउँपालिका वडा नम्बर ९ मा आज बिहान रजैयास्थित पूर्वपश्चिम सडकखण्डमा हटौंडाबाट चितवनतर्फ आउँदै गरेको ग ७ प २३०४ न.को मोटरसाइकललाई विपरीत दिशाबाट आएको एएस-२५ डिसी ०२१२ नम्बको ग्यास बुलेट गाडीले ठक्कर दिएको थियो ।
दुर्घटनामा मोटरसाइकल चालक पोखरा उपमहानगरपालिका वडा नम्बर ११ फुलबारी बस्ने ३१ वर्षीय सुवास गुरूङ र उनकी श्रीमती ३३ वर्षीया निर्मला अधिकारी घाइते भएका थिए । गम्भीर घाइते भएकी अधिकारीको उपचारको क्रममा हेटौंडास्थित सिएमसी चुरेहिल अस्पतालमा मृत्यु भएको जिल्ला प्रहरी कार्यालय मकवानपुरका डिएसपी लक्ष्मी भण्डारीले बताए ।
मोटरसाइकल चालक गुरूङले प्रहरीलाई दिएको जानकारीका अनुसार सेतो रंगको हाइलेक्स गाडीले अचानक ब्रेक लगाउँदा उक्त गाडी पछाडि रहेको उनीहरूको मोटरसाइकलले हाइलक्समा ठक्कर दिएको थियो । दुर्घटनाबारे प्रहरीले अनुसन्धान अघि बढाएको डिएसपी भण्डारीले जानाकरी दिए ।
