नयाँ दिल्ली, २२ जेठ
आज भारतमा लोक सभा निर्वाचनको नतिजा आउँदैछ । यतिबेला धमाधम मतगणना भइरहेको । प्रारम्भिक मत गणनामा भारतीय जनता पार्टी (बीजेपी)को सिट घट्ने देखिएपछि शेयर बजारमा त्रास छाएको छ । बीजेपी नेतृत्वको एनडीए गठबन्धनले ४०० भन्दा धेरै सिट जित्ने एक्जिट पोलले देखाएको थियो । तर प्रारम्भिक नतिजाअनुसार एनडीएको अग्रता ३०० सिटभन्दा तल छ ।
यसैबिच शेयर बजारमा हाहाकार देखिएको छ । मंगलबार एकै दिनमा भारतको प्रमुख शेयर परिसूचक सेन्सेक्स ६ हजार अङ्क भन्दा धेरैले घटेको छ । मध्याह्न १२ः२० मा सेन्सेक्स ६ हजार ९० अङ्कले घटेर ७० हजार ३७४ अङ्कमा आएको थियो ।
बिहानी कारोबारमै सेन्सेक्स १ हजार ७०० अङ्क घटेर खुलेको थियो । चुनावी मत परिणाम अगाडि आउँदै गर्दा बजार ओरालो लाग्ने क्रम तीव्र बनेको छ । मंगलबार एकै दिन सेन्सेक्स ७ दशमलव ९७ प्रतिशतसम्म घटेको थियो ।
उता, एनएसई निफ्टी पनि १ हजार ९०० अङ्कभन्दा धेरैले घटेको छ । मंगलबार निफ्ती २१ हजार ३१६ अंकसम्म आएको थियो ।
एकै दिनको कारोबारमा भारतीय लगानीकर्ताहरुले ३०० खर्ब भारु गुमाएका छन् । उक्त दिनको कारोबारमा रिलायन्स देखि टाटासम्म सबै कम्पनीको शेयर मूल्य घटेका छन् । अदानी समूहको शेयर मूल्यमा २३ प्रतिशतसम्मको कमी देखिएको थियो । -एजेन्सी
