कर्णाटक, १६ जेठ
सयौं महिलालाई यौन दुर्व्यवहार गरेको आरोप लागेपछि फरार भएका भारतका पूर्व सांसद प्रज्ज्वल रेभन्ना करिब एक महिनापछि स्वदेश फर्किने भएका छन् । एक अज्ञात स्थलबाट भिडियो सार्वजनिक गर्दै उनले आफू मे ३१ मा स्वदेश फर्किने जनाएका छन् ।
कर्णाटकको हसन क्षेत्रका सांसद रहिसकेका उनी अप्रिल २७ मा अचानक जर्मनीतर्फ भागेका थिए । उनका हजुरबुबा तथा पूर्व प्रधानमन्त्री एचडी देभेगौडाले गत साता आफ्ना नातिलाई सार्वजनिक रूपमा तत्काल स्वदेश फर्केर आउन र देशको कानुनको सम्मान गर्न आग्रह गरेका थिए ।
प्रज्ज्वलले आफ्नो सन्देशमा ३१ मेका दिन उनी स्पेसल इन्भेस्टिगेसन टीम (एसआईटी)समक्ष बयान दिनका लागि उपस्थित हुने जनाएका छन् । भिडियोमा उनले अझै पनि यौन हिंसाको आरोपलाई अस्वीकार गरेका छन् ।
महिलाहरुलाई यौन दुर्व्यवहार गरिएका सयौं भिडियो कर्णाटकको चुनावको समयभन्दा केही दिनअघि पेनड्राइभमा हालेर सर्वसाधारणलाई बाँडिएको थियो । बीबीसी
