भरतपुर, जेठ १
चितवन भरतपुर महानगरपालिका वडा नं १५ मा रहेको गौतम बुद्ध अन्तर्राष्ट्रिय क्रिकेट रंगशाला निर्माणको लागि आह्वान गरिएको बोलपत्र (टेण्डर) रद्द भएको छ । भरतपुर महानगरपालिकाले निर्माणको बोलपत्र प्रक्रिया रद्द भएको जनाएको छ ।
२०८० फागुन १७ गते आव्हान गरिएको बोलपत्र २०८१ को बैशाख ३१ गतेको निर्णय अनुसार रद्द भएको जानकारी दिएको हो। भरतपुर महानगरपालिका प्रमुख प्रशासकिय अधिकृत विरेन्द्र देव भारतीले सार्वजनिक खरिद अनुमगन कार्यालयले ठेक्का प्रक्रिया नियमसंगत नभएको उल्लेख गरेसंगै ठेक्का रद्द भएको जानकारी दिए । महानगरका इन्जिनियर साकार लामाले एउटा मात्रै कम्पनीको टेण्डर परेको र अन्य ठेक्का प्रक्रिया नियमसंगत नभएकाले टेण्डर रद्द गरिएको जानकारी दिए ।
सार्वजनिक खरिद अनुमगन कार्यालयले ठेक्का प्रक्रिया नियमसंगत नभएको जनाएपछि भरतपुर महानगरले बोलपत्र आह्वान रद्द गरेको हो । भरतपुर महानगरको ठेक्का प्रक्रियालाई लिएर खरिद अनुगमन कार्यालयमा मुद्दा परेको थियो ।
मुद्दा परेपछि खरिद अनुगमन कार्यालयले भरतपुर महानगरलाई ठेक्का प्रक्रिया नमिलेको जनाएको थियो । प्रमुख प्रशासकीय अधिकृत भारतीका अनुसार महानगरले ठेक्का आब्हान गरी ठेकेदार छनोट गरेको थियो, जुन विधिलाई अनुगमन कार्यालयले विधि नपुगेको जनायो ।
ठेक्का प्रक्रिया मिलेन भनी पत्र आएपछि महानगरले बोलपत्र आह्वानलाई नै रद्द गरी अर्को प्रक्रिया सुरु गर्ने तयारी गरेको छ । भरतपुर महानगरपालिकाले पहिलो चरणको निर्माणका लागि १ अर्बभन्दा बढीको ठेक्का आह्वान गरेको थियो ।
गत कात्तिकमा बागमती प्रदेश सरकारको ७० र भरतपुर महानगरपालिकाको ३० प्रतिशत लगानी रहने गरी सम्झौता पनि भएको छ । सोही सम्झौताका आधारमा भरतपुर महानगरले पहिलो पटक ठेक्का आह्वान गरेको हो ।
विसं २०७५ सालमा २० बिघा ६ कठ्ठा जग्गामा रंगशाला निर्माणको काम धुर्मुुस सुन्तली फाउन्डेसनले थालेको थियो । कोरोना कहरका कारण रकम संकलन नहुँदा फाउन्डेसनले २०७८ साउनदेखि निर्माणको काम अगाडि बढाउन नसकिएको भन्दै भरतपुर महानगरलाई नै परियोजना सुम्पेको थियो ।
