– हिरालाल आचार्य ‘डायमण्ड’
चितवन, बैशाख १५ –
विज्ञापन कर न तिर्ने राष्ट्रिय तथा अन्तर्राष्ट्रिय कम्पनीको विज्ञापनजन्य बोर्डहरु भरतपुरबाट धमाधम हटाउन थालिएको छ ।
विभिन्न कम्पनीले भरतपुरका विभिन्न पसल र सडकहरुमा विज्ञापनजन्य बोर्ड राखेर आफ्नो विज्ञापन गरिरहेका छन् । त्यसबापतको विज्ञापन कर महानगरपालिकालाई कम्पनीहरुले तिर्नुपर्छ । तर केही कम्पनीहरुले विगत तीन वर्षदेखि कर तिरेका छैनन् ।
ती कर न तिर्ने कम्पनीको बोर्डहरु महानगरपालिका र प्रनिश कन्स्ट्रक्सनले हटाउन थालेको हो । गत हप्ता अन्तर्राष्ट्रिय इलेक्ट्रोनिक ब्राण्डका बोर्डहरु हटाइएको थियो ।
भरतपुरमा कर उठाउने जिम्मा पाएको प्रनिश कन्स्ट्रक्सनले पटकपटक ताकेता गर्दा पनि कर तिर्न अटेर गरेपछि आज बोर्ड हटाइएको प्रनिश कन्स्ट्रक्सनका प्रतिनिधि दिपक घिमिरेले जानकारी दिए । उनले चरणवद्धरुपमा कर न तिर्ने कम्पनीका विज्ञापनजन्य बोर्डहरु हटाइने बताए । कम्पनीका बोर्ड हटाएपछि कर न तिर्ने वित्तीय संस्था, शैक्षिक संस्था लगायका संघसंस्थाको विज्ञापन बोर्ड हटाउन सरु गरिने उनले जानकारी दिए ।
आज गोल्ड स्टार जुत्ता, जस्मिन पेन्टस्, हाई लाफाई फुड्स, सन्तुर साबुनका बोर्डहरु हटाइएको हो । उनले आगामी दिनमा कर नतिर्ने अन्य कम्पनीका बोर्डहरु हटाउँदै जाने बताए । अहिले भरतपुरको बजारक्षेत्रबाट सुरु गरिएको र बजारको सकिएपछि ग्रामिण क्षेत्रमा पुग्ने उनको भनाइ छ ।
त्यसैगरी आफ्नो व्यसायको बोर्ड राख्दा ३० स्क्वायर फुट भन्दा बढीको बोर्ड राख्न पाइँदैन । ३० स्क्वायर फुटभन्दा बढी साइजका बोर्ड राख्ने व्यासायीहरुसँग महानगरपालिकाले कर उठाइरहेको छ । कर नतिरेमा ती व्यवसायीको ठूला बोर्ड पनि हटाइने गरिएको छ ।
