भरतपुर, २५ चैत
आजदेखि भरतपुरमा प्रथम अन्तर प्रदेश राष्ट्रिय खेलकुद प्रतियोगिता सुरु हुने भएको छ । आज अपराह्न ४ बजे भरतपुरस्थित गौतम बुद्ध अन्तर्राष्ट्रिय क्रिकेट रङ्गशालामा पुष्पकमल दाहाल ‘प्रचण्ड’ ले उद्घाटन गर्ने कार्यक्रम रहेको छ ।
बागमती प्रदेश सरकार, सामाजिक विकास मन्त्रालय र प्रदेश खेलकुद विकास परिषद्, बागमती प्रदेशको संयुक्त आयोजनामा उक्त प्रतियोगिता सुरु हुन लागेको हो ।
प्रतियोगितामा एथलेटिक्स, भलिबल, फुटबल, कराते, तेक्वान्दो, बक्सिङ, पौडी, ब्याडमिन्टन र क्रिकेट गरी ९ विधामा प्रतिस्पर्धा हुनेछ । पुरुष फुटबल बाहेक सबै खेल चितवनमा हुनेछ । पुरुष फुटबल भने हेटौँडास्थित गौरीटार रङ्गशालामा हुनेछ ।
प्रतियोगितामा १ सय ३६ स्वर्ण, १ सय ३६ रजत र १ सय ८४ कांस्यका लागि प्रतिस्पर्धा हुनेछ । प्रतियोगितामा सातै प्रदेशका १ हजार ५ सय ४७ खेलाडी सहभागी हुने बताइएको छ ।
प्रतियोगिताको समापन बैशाख १ गते हेटौँडाको गौरीटार रङ्गशालामा हुनेछ ।