चितवन, २ चैत
राप्ती नगरपालिका वडा नं-२, गड्यौलीस्थित पूर्वपश्चिम राजमार्गमा मारूती भ्यानको ठक्करबाट मोटरसाइकलमा सवार दुई जना घाइते भएका छन् ।
घाइते हुनेहरुमा मोटरसाइकल चालक नुवाकोट विदुर नगरपालिका वडा नं-३ बस्ने ५५ वर्षीय मिठुबहादुर खड्का र मोटरसाइकलपछाडि सवार विदुर नगरपालिका वडा नं-४ बस्ने ७१ वर्षीय लोकबहादुर रिमाल रहेका छन् ।
भण्डाराबाट गड्यौलीतर्फ जाँदै गरेको बा १५ च ६९९६ नम्बरको भण्डारा आमा मन्टेश्वरी स्कुलको मारूती भ्यानले सोही दिशातर्फ जाँदै गरेको बा २७ प ६६५ नम्बरको मोटरसाइकललाई ठक्कर दिएको प्रहरीले जनाएको छ ।
घाइते दुवैजनाको पुरानो मेडिकल कलेज भरतपुरमा उपचार भइरहेको छ। रिमालको अवस्था भने गम्भीर रहेको प्रहरीले जनाएको छ । दुवै सवारीसाधन तथा भ्यान चालकलाई नियन्त्रणमा लिइएको छ ।