चितवन,फागुन १९-
एकता शिशु निकेतनको छात्रावासमा छात्राको मृत्यु भएको विषयमा अनुसन्धान प्रभाव पार्नेगरी कुनै सामाग्री सम्प्रेषण नगर्न चितवन प्रहरीले आग्रह गरेको छ ।
प्रहरी नायव उपरिक्षक एवं चितवन प्रहरी प्रवक्ता श्रीराम भण्डारीले आज एक विज्ञप्ति जारी गर्दै घटनाका सम्बन्धमा जानकारी आए लगत्तै प्रहरीले गम्भीर अनुसन्धान गरिरहेकाले अनुसन्धानमा प्रभाव पर्ने गरी कुनै पनि सामग्री सामाजिक सञ्जाल तथा सञ्चार माध्यममा सम्प्रेषण नगर्न समेत अनुरोध गरेका छन् ।
घटनालाई लिई विभिन्न सामाजिक सञ्जाल तथा सञ्चार माध्यमहरुमा सम्प्रेषित विषय बस्तु प्रति कार्यालयको गम्भिर ध्यानाकर्षण भएको पनि उनले बताएका छन् ।
रत्ननगर नगरपालिका–१० मा रहेको एकता शिशु निकेतन बोर्डिङ स्कुलमा कक्षा ८ मा अध्ययनरत १४ वर्षीय एक छात्रा फागुन १२ गते छात्रावासको पंखामा झुण्डिएको अवस्थामा फेला परेकी थिइन् ।
घटनाको सूचना प्राप्त हुनासाथ तत्काल सिनियर प्रहरी अधिकृतको कमाण्डमा घटनास्थलमा विशेषज्ञ सहितको अनुसन्धान टोली खटी गई घटनास्थल र मृतक शवको सुक्ष्म अवलोकन गरी प्रारम्भिक चरणका अनुसन्धानका कार्यहरु सम्पन्न गरी हाल सो घटनाको गम्भिर रुपमा थप अनुसन्धान कार्य भई रहेको भण्डारीले बताए ।
बालबालिकाको मृत्यु जस्तो संवेदनशिल विषयलाई अत्यन्त गम्भिर्यताका साथ लिई प्रचलित कानूनले निर्दिष्ट गरे बमोजिम प्रहरीले आफ्नो पेशागत मुल्य मान्यता, दक्षता र विवेक प्रयोग गरी अनुसन्धान गरिरहेको उनले बताए । बैज्ञानिक प्रयोग तथा प्राबिधिक विश्लेषण समेतको आधारमा तथ्य परक बस्तुनिष्ठ अनुसन्धान गर्ने उनले प्रतिबद्धता पनि जनाएका छन् ।